Երեկ Տավուշում մահացած զինծառայողը միակողմանի ծնողազուրկ էր. մանրամասներ

Երեկ ՀՀ հյուսիսարևելյան ուղղությամբ տեղակայված զորամասերից մեկի պահպանության տեղամասում մահացու հրազենային վիրավորում ստացած ժամկետային զինծառայող, կրտսեր սերժանտ Գագիկ Մեսրոպյանը Սյունիքի մարզի Տեղ համայնքից էր: Yerkir.am-ի հետ զրույցում Տեղի գյուղապետ Ներսես Շադունցը հայտնեց, որ Գագիկը միակողմանի ծնողազուրկ էր, տան միակ երեխան:

Նրա խոսքով՝ զինծառայողի հայրը մահացել էր մի քանի տարի առաջ՝ սրտային հիվանդությունից: Գյուղապետը հայտնեց, որ ընտանիքը սոցիալապես անապահով վիճակում է, մայրը չի աշխատում:

Նշենք, որ զինծառայողը բանակ էր զորակոչվել Էջմիածնի զինկոմիսարիատից: Գյուղապետի խոսքով՝ Գագիկի մայրն Էջմիածնից է, և տղան էլ էր այնտեղ հաշվառված, դրա համար էլ այնտեղից էր զորակոչվել բանակ: «Օրինակաելի երիտասարդ էր, խելոք, համեստ»,- ասաց նա:

Նշենք, որ, նախնական տվյալներով, Գ.Մեսրոպյանը վնասվածք է ստացել ծառայակցի կողմից զենքի հետ վարվելու կանոնները խախտելու հետևանքով: ՀՀ քննչական կոմիտեի ԶՔԳՎ 6-րդ կայազորային քննչական բաժնում հարուցվել է քրեական գործ՝ ՀՀ քրեական օրենսգրքի 373-րդ հոդվածի 3-րդ մասով (զենքի հետ վարվելու կանոնները խախտելը, որն անզգուշությամբ առաջացրել է մարդու մահ), կատարվում է նախաքննություն: