Երբ նոր գործ եմ գրում, մտածում եմ` ե՞րբ են մերոնք` հայերը, լսելու. Տիգրան Համասյանը համերգով հանդես եկավ

Երեկ «Արամ Խաչատրյան» համերգասրահում տեղի ունեցավ Տիգրան Համասյանի մենահամերգը: Այն կայանում էր Համասյանի «An Ancient Observer» ալբոմի համերգային շրջագայության շրջանակներում և կազմակերպել էր «TM production»-ը: 

Հանդիսատեսն առանց բիսի «թույլ չտվեց», որ Համասյանը հեռանա դահլիճից, այն էլ` երկու անգամ: Համերգը եզրափակվեց, ինչպես Համասյանը նշեց, «ԼեննաԳան» ստեղծագործությամբ:

Հիշեցնենք, որ նախօրեին Համասյանն ասել էր, որ ամենից առավել հուզվում և վախենում է, երբ հայ հանդիսատեսի առջև է ելույթ ունենում. «Հայաստանում ամեն անգամ ելույթով հանդես գալիս վախ կա ինձ մոտ, ավելի ճիշտ, ոչ թե վախ է, այլ` պատասխանատվության զգացում: Ես ոչ մի համերգի պատրաստվելիս այդքան մեծ էներգիա չեմ ծախսում, որքան հայաստանյան համերգի համար: Ինձ մոտ նաև անհամբերություն կա, այսինքն` երբ ինչ-որ գործ եմ գրում, մտածում եմ` տեսնես ինչպե՞ս կընդունեն Հայաստանում, և ե՞րբ են մերոնք լսելու»: Երեկվա համերգը և հանդիսատեսի ջերմ ընդունելությունը հաշվի առնելով` կարծում ենք` սպասելիքներն արդարացված էին` թե՛ հանդիսատեսի, թե՛ Համասյանի համար:

 Ներկայացնում ենք համերգից մի հատված: