Մեր նպատակն է եղել հիմնել ինքնատիպ շարժում. Նուբար Աֆեյան

«Ավրորա» մրցանակի հավակնորդներին  ներկայացրեցին Ռուբեն Վարդանյանը և Նուբար Աֆեյանը: Դրանից հետո նրանք պատասխանեցին լրագրողների հարցերին:

Դիտարկմանը` այս մրցանակաբաշխությունը հիմնականում ողջունվել է, բայց քննադատություն կա, որ նրանք փորձում են Հայաստանը որպես հումանիզմի երկիր ներկայացնել, և որ նրանց կազմակերպությունը չի անդրադառնում ներհայաստանյան` մարդու իրավունքների խախտումներին, Աֆեյանն արձագանքեց` ասելով, որ իրենց նպատակն է եղել հիմնել ինքնատիպ շարժում, որի նպատակը մարդասիրությունն է: «Այդ շարժման նպատակն է մարդասիրական ձևով ներկայացնել, որ կան մարդիկ, ովքեր այսօր իրենց կյանքը վտանգի տակ են դնում` ուրիշներին օգնելու համար, ինչպես հարյուր տարի առաջ որոշ մարդիկ արեցին` հայերին օգնելու համար»,- ասաց նա, ապա հավելեց. «Պարզապես Առաջին աշխարհամարտի ժամանակ հայերը հնարավորություն չունեին նրանց շնորհակալություն հայտնելու, նշելու նրանց անունները, ովքեր աջակցել են իրենց: մենք այսօր նրանց անունները նշելու հնարավորություն ունենք, նաև` նրանցը, ովքեր այսօր են օգնում»:

Հարցի երկրորդ մասին անդրադարձավ Վարդանյանը, նա նշեց, որ մենք չպետք է խոսենք միայն մեր մասին: Ըստ նրա` պետք  է փոխել մոտեցումը:  «Մենք ուզում ենք ասել, որ, մեր ցավով հանդերձ, պետք է ուրիշների մասին մտածենք: Մենք ճիշտ բան ենք արել, մենք այլ կերպ պետք է նայենք հարցերին»,- հայտարարեց նա, ապա նշեց, որ իրենց նպատակն է փոխել մարդկանց վերաբերմունքը:

Ինչ վերաբերում է հարցին` անցած տարի Ջորջ Քլունին է մասնակցել մրցանակաբաշխությանը, այս տարի կլինե՞ն հայտնի մարդիկ, Վարդանյանը պատասխանեց, որ լրագրողների համար հետաքրքիր մարդիկ կլինեն, ապա նշտեց, որ ամենակարևոր մարդիկ «Ավրորա»-ի մասնակիցներն են` այդ 5 հերոսները: