«Բայց վերջում ընտրեք մեզ». Կարեն Կարապետյանն «ուղղեց» Սերժ Սարգսյանին

ՀՀԿ-ն Կարեն Դեմիրճյանի անվան մարզահամերգային համալիրում ամփոփեց քարոզարշավը: Վարչապետ Կարեն Կարապետյանը հայտարարեց, որ մենք տաղանդավոր ժողովուրդ ենք, ունենք մեծ ներուժ մեր երկիրը ֆանտաստիկ դարձնելու համար: Նա նշեց, որ քարոզարշավն արդեն ավարտվել է, և կարող է հայտարարել, որ ինքն իր հետ համերաշխ է:

«Չկա մի բան, որ ասել եմ եւ պատրաստ չեմ անել»,- հայտարարեց Կարապետյանը եւ հավելեց, որ չի հրապուրվել՝ ասելով մի բան, որ դիմացինին դուր գա: Նա վստահեցրեց, որ իրենք ազնիվ են եղել, ՀՀԿ-ի ծրագիրն էլ հավակնոտ է ու համարձակ:

«Ապրիլի 2-ին մենք որոշելու եք մեր ապագան: Վստահեք մեզ, ուռա»,- եզրափակեց Կարապետյանը:

Ելույթով հանդես եկավ նաեւ հանրապետության նախագահ, ՀՀԿ ղեկավար Սերժ Սարգսյանը: Նա իր խոսքում նշեց, որ դեռ շատ անելիքներ ունեն:

«Վերջնական հանգրվանի պետք է հասցնենք այն, ինչ սկսել ենք»,- ասաց նախագահը եւ նշեց, որ լավ ապրելու համար պետք է նախ պաշտպանել լավ ապրելու իրավունքը:

Վերջում Սերժ Սարգսյանը հորդորեց ընտրել նրան, ում կցանկանան, բայցեւ հիշեցրեց, որ լավ ապրելու պայմանը տեւական աշխատանքն է:

Երբ նա ավարտեց ելույթը խոսափողին մոտեցավ Կարեն Կարապետյանը եւ կեսկատակ-կեսլուրջ հայտարարեց. «Բայց վերջում ընտրեք մեզ»: