Մեծ Բրիտանիայում շրջանառության մեջ է դրվում մեկ ֆունտ անվանական արժեքով նոր մետաղադրամ

Մարտի 28-ին Մեծ Բրիտանիայում շրջանառության մեջ է դրվում մեկ ֆունտ անվանական արժեքով նոր մետաղադրամը, որն ունի 12 եզր և բարձր աստիճանի պաշտպանություն դրամանենգներից:

Ինչպես ավելի վաղ հայտարարել է Թագավորական դրամահատարանը, այն փոխարինելու կգա մեկֆունտանոց մետաղադրամին, որն օգտագործվում է արդեն ավելի քան 30 տարի, հայտնում է «ТАСС»-ը:

Ինչպես հայտարարել են Մեծ Բրիտանիայի ֆինանսների նախարարությունում, «նոր ֆունտը կդառնա ամենապաշտպանված մետաղադրամն աշխարհում»: Սպասվում է, որ մետաղադրամների փոխարինման բուն գործընթացը կավարտվի 2017 թվականի աշնանը: Այդ ժամանակ էլ ակնկալվում է դադարեցնել հին ֆունտի շրջանառությունը, որը դեռ կընդունեն բանկերն ու փոստը: