ՀՀԿ-ն երեք հույս ունի` Աստված, ժողովուրդ և մենք. Էդուարդ Շարմազանով

Այսօր լրագրողների հետ զրույցում ԱԺ փոխխոսնակ Էդուարդ Շարմազանովն անդրադարձավ ՀՀԿ քարոզարշավին: Նրա խոսքով` կան ուժեր, որոնք պոպուլիստական քարոզարշավ են տանում, կան ուժեր, որոնք նախընտրում են ծրագրային պայքարը, և լավ կլիներ, որ բոլորն իրականացնեին ծրագրային պայքար:

Դիտարկմանը, որ, ըստ սոցհարցումների, «Ծառուկյան» դաշինքը վարկանիշով գերազանցում է ՀՀԿ-ին, Էդուարդ Շարմազանովը պատասխանեց, որ, նախ, այդ սոցհարցումները արվել են մինչև քարոզարշավի մեկնարկը, բացի դրանից` դրանք չեն ներառում ռեյտինգային թեկնածուների աշխատանքի ազդեցությունը: Նրա խոսքով` ճիշտ և ազնիվ քարոզարշավի դեպքում հիմքեր կան` ասելու, որ ՀՀԿ-ն հաջողություն կունենա և կդառնա առաջատար:

Հարցին, թե ինչո՞վ է պայմանավորված այն հանգամանքը, որ, ըստ հարցումների, վարչապետ Կարեն Կարապետյանի վարկանիշը 80 տոկոս է, Շարմազանովը պատասխանեց. «Դա պայմանավորված է նրա արդյունավետ աշխատանքով և ժողովրդի սպասումներով»:

Հարցին, թե ի՞նչ հույսեր ունի ՀՀԿ-ն` այս ընտրությունների հետ կապված, արձագանքեց. «Երեք հույս ունենք` Աստված, ժողովուրդ և մենք»: