Հայրիկյանը բորբոքվեց

Դեռ մեկ շաբաթ առաջ nախագահի թեկնածու, ԱԻՄ կուսակցության նախագահ Պարույր Հայրիկյանը լրագրողների հետ հանդիպման ժամանակ բառացի հայտարարել էր, որ եթե նախագահի թեկնածու Անդրիաս Ղուկասյանը չդադարեցնի հացադուլը, ապա ինքը երկու-երեք օրով կմիանա Անդրիասին եւ կհամոզի, որ միասին դադարեցնեն հացադուլը: Անդրիաս Ղուկասյանի հացադուլին Հայրիկյանը միացավ, բայց մի քանի ժամով:

Այսօր լրագրողների հետ հանդիպման ժամանակ, երբ Yerkir.am-ը փորձեց Հայրիկյանից ընդամենը ճշտել, թե ինչու երկու-երեք օրը դարձավ երկու-երեք ժամ, նախագահի թեկնածուն ակնհայտորեն բորբոքվեց: Հայրիկյանը նախ հայտարարեց, որ առավել ուշադիր լինենք, որ իր ասածները ճիշտ հասկանանք, հետո էլ, երբ, այդուհանդերձ, խնդրեցինք, ամեն դեպքում կարճ պարզաբանում տալ, դա նրան կռիվ անել թվաց: «Ես երեք օր չոր հացադուլով եմ միացել Անդրիասին: Ես հացադուլեր շատ եմ արել, անգամ` 12 օրով, բայց չոր հացադուլ երբեք չէի արել: Ես Անդրիասին այցելել եմ յոթ անգամ, երկու ժամ անցկացրել եմ իր կողքին, բայց այդ երեք օրերի ընթացքում կատարյալ իր հետ եմ եղել: Երեք օրը ես տարա ոչ մեծ դժվարությամբ, միայն երրորդ օրվա գիշերն եմ վատ զգացել, անընդմեջ ջրի պահանջ էի զգում: Ես իմ պարտականությունը կատարել եմ»,- հայտարարեց Հայրիկյանը եւ ընդգծեց, որ մի առաքելություն էլ է կատարել Անդրիաս Ղուկասյանի համար, որ կարելի է բողոքի ցույց անել հացադուլով, բայց ավարտել՝ չգնալ մինչեւ վերջ, մինչեւ ինքնասպանություն:

P.S. Yerkir.am-ի հարցերը վերջին շրջանում ակնհայտորեն հունից հանում են Հայրիկյանին: Խորհուրդ ենք տալիս տողատակեր չփնտրել մեր հարցերում, լինել առավել զուսպ, նախընտրական շրջանում պետք է խնայել մեր եւ ձեր նյարդերը: