Էրդողանի, Յըլդըրըմի ու Բահչելիի դեմ դատական հայց է ներկայացվել

Թուրքիայի «Աշխատանք» կուսակցությունը (Emek Partisi) դատական հայց է ներկայացրել նախագահ Ռեջեփ Թայիփ Էրդողանի, վարչապետ Բինալի Յըլդըրըմի և «Ազգայնական շարժում» կուսակցության (MHP-ԱՇԿ) նախագահ Դևլեթ Բահչելիի նկատմամբ:

Ըստ Ermenihaber-ի՝ հայցով պահանջվում է նրանց դատել «ժողովրդի շրջանում խուճապ, վախ և անհանգստություն առաջացնելու նպատակով սպառնալիքների կիրառման» և «Ժողովրդի մեջ ատելություն և թշնամություն սերմանելու կամ ժողովրդին ստորացնելու» մեղադրանքով:

Նշված մեղադրանքների համար որպես հիմնավորում է ներկայացվել այն փաստը, որ սահմանադրական փոփոխությունների հանրաքվեին դեմ արտահայտվող անձինք կամ կազմակերպությունները հռչակվում են «ահաբեկիչ», «հայրենիքի թշնամի», «անջատողական», «հեղաշրջման կողմնակից» և այլն:

Ըստ թուրքական «Demokrathaber.net» լրատվական կայքի` հայցի մեջ ներառված է Դևլեթ Բահչելիի` կուսակցական ժողովի ժամանակ ասած խոսքերը:

Նա սահմանադրական փոփոխություններին աջակցելու համար իրենց քննադատողների հասցեին վիրավորական արտահայտություններ է արել` նույն հարթության մեջ դնելով փոփոխություններին դեմ արտահայտվող քաղաքական կուսակցություններին ու ահաբեկչական կուսակցություններին: