Խորհրդարանում հայտնվելու մեծ հավակնություններ չունի, բայց կառաջադրվի

Բոստանջյանին բոլորովին սազական չէ նեղանալը, քաղաքական կյանքում յուրաքանչյուր պահի կարող են տեղի ունենալ տարբեր զարգացումներ, անհիմն է «մեղադրել» իրեն ԲՀԿ-ից նեղացվածության մեջ. Yerkir.am-ի հետ զրույցում ասաց Վարդան Բոստանջյանը, ով ենթադրում է, որ ընդգրկված է լինելու «Ծառուկյան դաշինք»-ում:

«Գագիկ Ծառուկյանը հարմար է գտնում համապատասխան մարդկանց հրավիրել, ներառել և, ընդհանրապես, մեր երկրի համար գործունություն և աշխատանք ծավալել»,- ասաց մեր զրուցակիցը և հստակեցրեց, որ իրեն համագործակցության հրավերով դիմել է ոչ թե Գագիկ Ծառուկյանը` անձամբ, այլ սովորականի նման, երբ կուսակցությունում խորհրդակցություն կամ նիստ է եղել, նրան զանգահարել, հրավիրել են:

Բոստանջյանը նաև վստահեցրեց, որ ինքը շարունակել է համագործակցությունը ԲՀԿ-ի հետ, անգամ` այն ժամանակ, երբ Գագիկ Ծառուկյանը հեռացել էր ակտիվ քաղաքականությունից:

Նա հայտնեց, որ ռեյտինգային ընտրակարգով առաջադրվելու է իր հայրենի Բայազետից, սակայն նշեց, որ խորհրդարանում հայտնվելու մեծ հավակնություններ չունի: «Բոստանջյանը գիտնական մարդ է, քանի երկրների ակադեմիաների անդամ է և այն մարդկանից չէ, որոնք շնչահեղձ ուզում են հայտնվել խորհրդարանում»,- ասաց մեր զրուցակիցը:

Բոստանջյանը խոսեց նաև ձևավորվող դաշինքերի, մասնավորապես` «Օհանյան-Օսկանյան-Հովհաննիսյան» դաշինքի մասին: «Դժվար է դաշինքներին գնահատական տալը, բայց արդեն իսկ գնահատականը բարձր է նրանով, որ մեր երկրի հոգսերով, երկրի առջև ծառացած խնդիրներով մտահոգված մարդիկ են, որոնք ոչ թե երեկ սկսեցին մտահոգվել, այլ շուտվանից ուզում են մեր հանրապետությունը տեսնել ավելի բարեկեցիկ և հիմա միավորվել են, ինչը ես ողջունում եմ: Դաշինքները կօգնեն բազմակարծություն ստեղծել նաև «Ծառուկյան դաշինք»-ի շուրջ»,- ասաց նա:

Բոստանջյանի խոսքով՝ քաղաքական դաշտի ձևավորումն ընթացիկ ժամանակահատվածում արդեն խոսում է այն մասին, որ Հայաստանում քաղաքական համակարգն իր կարծրացած վիճակից դուրս է գալիս և ձեռք բերում քաղաքական համակարգերին բնորոշ հատկություններ: