Ադրբեջանի խորհրդարանում կոչ է հնչել` նոտա հղել Ֆրանսիային

Ադրբեջանի Միլի մեջլիսի պատգամավոր Ազայ Ղուլիևի կարծիքով` անհրաժեշտ է բողոքի նոտա հղել պաշտոնական Փարիզին Ֆրանսիայի նախագահ Ֆրանսուա Օլանդի` վերջերս արած հայտարարություններից մեկի կապակցությամբ. հայտնում է haqqin.az-ը:

Պատգամավորին վրդովեցրել է, թե ինչու է Օլանդը ֆրանսահայ կազմակերպությունների հետ հանդիպման ժամանակ աջակցություն հայտնել  ազգերի ինքնորոշման իրավունքին` այդպիսով հայամետ քաղաքականություն վարելով:

«Այդ պատճառով Ադրբեջանի ԱԳՆ-ն պետք է բողոքի նոտա հղի Ֆրանսիային»,- հայտարարել է Ղուլիևը` ի միջի այլոց էլ հավելելով, որ հենց Ֆրանսիայի ներկայացուցիչներն են «ավելի հաճախ ապօրինաբար այցելում» Լեռնային Ղարաբաղ:

Միլի մեջլիսի նախագահ Օքթայ Ասադովն էլ փորձել է մեղմել պատգամավորի բոցաշունչ ելույթը` նշելով. «Օլանդի հայտարարությունը, հավանաբար, համատեքստից կտրված է, քանի որ Հայաստանի ԶԼՄ-ները նրա ելույթն ամբողջությամբ չեն ներկայացրել»: