Լոնդոնում և Բեռլինում ԱՄՆ դեսպանությունները դադարեցրել են վիզաների տրամադրումը

Մեծ Բրիտանիայում ԱՄՆ դեսպանությունը տեղեկացրել է, որ դադարեցնում է ամերիկյան վիզաներ տրամադրել Իրաքի, Իրանի, Լիբիայի, Սոմալիի, Սուդանի, Սիրիայի և Եմենի քաղաքացիներին` կապված ԱՄՆ նախագահ Դոնալդ Թրամփի միգրացիոն հրամանագրի հետ:

Ինչպես տեղեկացնում է Gazeta.ru-ն, դեսպանությունից հայտնում են, որ մուտքի արտոնագիր չի տրամադրվի նաև երկակի քաղաքացիություն ունեցող անձանց, եթե նրանց անձնագրերից մեկը կլինի արգելքի տակ հայտնված 7 երկրներից մեկից:

Հաղորդվում է նաև, որ նման որոշում է կայացրել նաև Բեռլինում ԱՄՆ դեսպանությունը, որը ամերիկյան վիզաների տրամադրման դադարի մասին հայտարարել է իր ֆեյբուքյան էջում:

Ավելի վաղ հաղորդվում էր, որ Դոնալդ Թրամփի վարչակազմում «աննախադեպ հաջողություն» են համարում հրամանագրի իրագործումը:

Հիշեցնենք, որ նախօրեին տվյալ հրամանագրի շուրջ կոշտ քննադատությամբ հանդես էին եկել մի շարք համաշխարհային առաջնորդներ, այդ թվում` Գերմանիայի կանցլեր Անգելա Մերկելը, Կանադայի վարչապետ Ջասթին Տրյուդոն և Լոնդոնի քաղաքապետ Սադիկ Հանը: