Սաակաշվիլիի կուսակցությունը կոչ է արել Կիևին Վրաստանի քաղաքացուն չարտահանձնել ՌԴ-ին

Վրաստանի նախկին նախագահ Միխեիլ Սաակաշվիլիի ընդդիմադիր «Միացյալ ազգային շարժում» կուսակցությունը կոչ է արել Կիևին չարտահանձնել Ռուսաստանին Վրաստանի քաղաքացի Գեորգի Ցերցվաձեին, որը ՌԴ տարածքում սպանության կասկածանքով հետախուզման մեջ է գտնվում Ինտերպոլի կողմից, գրում է «ՌԻԱ Նովոստի»-ն:

«Միացյալ ազգային շարժումը» պատրաստվում է մի շարք միջոցառումներ անցկացնել, մենք լիարժեք քաղաքական և իրավաբանական աջակցություն ենք հայտնում փոխգնդապետ Գեորգի Ցերցվաձեին: Եթե ուկրաինական դատարանը որոշում կայացնի նրա արտահանձնման վերաբերյալ, մենք պատրաստ ենք օգնել փաստաբաններին բողոքարկել որոշումը Ստրասբուրգի դատարանում: Մենք դիմում ենք ուկրաինական դեսպանատանը հայտարարությունով, որ չպետք է իրականացվի այդ մարդու արտահանձնումը Ռուսաստանին»,- ճեպազրույցի ժամանակ հայտարարել է «Միացյալ ազգային շարժում» կուսակցության անդամ Ակակի Մինաշվիլին:

Ավելի վաղ Ուկրաինայի գլխավոր դատախազի մամուլի քարտուղար Լարիսա Սարգանը հայտարարել է, որ դատական նիստի ժամանակ ձերբակալվածի փաստաբանը հայտնել է, որ նրա պաշտպանյալը մասնակցել է Ուկրաինայի արևելքում մարտերին ուկրաինական կամավորական ուժերի շարքերում և ռուսական կողմի մեղադրանքները նրա հասցեին կեղծ են ու քաղաքական բնույթ են կրում: Սարգանը հավելել է, որ Ուկրաինայի արևելքում կամավորական ուժերի կազմում մարտական գործողություններին մասնակցության մասին տեղեկատվության հաստատման դեպքում ՌԴ-ին կմերժվի արտահանձնման դիմումը: