ՀՀ-ի ընտրությունները և Վրաստանի արձագանքը․ ակցիա դեսպանատան մոտ, Սաակաշվիլիի հայտարարությունները և Կոբախիձեի վաղ շնորհավորանքը

Հայաստանի խորհրդարանական ընտրություններն ակտիվ քննարկման առարկա դարձան Վրաստանում՝ արձագանք առաջացնելով ինչպես վրացական ընդդիմության մի մասի, այնպես էլ իշխանության ներկայացուցիչների շրջանում։

Հունիսի 7-ին՝ քվեարկության օրը, Թբիլիսիում Հայաստանի դեսպանատան մոտ տեղի ունեցավ ակցիա, որը կազմակերպել էր վրացական ընդդիմադիր ակտիվիստների մի խումբ։ Կազմակերպիչները հայտարարում էին, որ աջակցում են հայ ժողովրդին և Հայաստանին։ Միջոցառման մասին տեղեկությունը տարածել էր նաև Վրաստանի նախկին նախագահ Սալոմե Զուրաբիշվիլին։

Ակցիան սկսվեց Հայաստանի ընտրատեղամասերի փակվելուց մոտ մեկ ժամ առաջ։ Չնայած լայն հայտարարությանը՝ տեղում հավաքվել էր մոտ 15–20 մարդ։ Մասնակիցների թվում էր նաև Սալոմե Զուրաբիշվիլին։ Մասնակիցների հայտարարություններից ելնելով՝ միջոցառումը կապված էր Հայաստանի եվրոպական կուրսի և երկրի գործող կառավարության աջակցության հետ։ Ակցիայի ավարտից հետո մասնակիցները շարժվեցին դեպի Վրաստանի խորհրդարանի շենք, որտեղ արդեն երկար ժամանակ ամեն օր հավաքվում են վրացական ընդդիմության ներկայացուցիչները, որոնք չեն ճանաչում գործող իշխանությունների լեգիտիմությունը։

Հայաստանի ընտրությունների վերաբերյալ իր դիրքորոշումն էր հայտնել նաև կալանքի մեջ գտնվող Վրաստանի նախկին նախագահ Միխեիլ Սաակաշվիլին։ Քվեարկությունից մի քանի օր առաջ նա դիմել էր Հայաստանի քաղաքացիներին՝ առաջիկա ընտրությունները որակելով ճակատագրական ոչ միայն Հայաստանի, այլև ամբողջ տարածաշրջանի համար։

Նրա ուղերձում կենտրոնական տեղ էր զբաղեցնում Հայաստանի քաղաքական գործընթացների համեմատությունը Վրաստանում 2012 թվականից հետո տեղի ունեցած իրադարձությունների հետ։ Սաակաշվիլին պնդում էր, որ Հայաստանը կանգնած է ընտրության առաջ՝ պահպանել ներկայիս քաղաքական կուրսը, թե գնալ այն սցենարով, որը նա կապում է Բիձինա Իվանիշվիլիի` իշխանության գալու հետ։ Իր հայտարարություններում նա Սամվել Կարապետյանին անվանում էր «հայկական Իվանիշվիլի», իսկ ընտրությունները ներկայացնում էր որպես ընտրություն երկրի զարգացման երկու տարբեր աշխարհաքաղաքական և քաղաքական մոդելների միջև։

Քվեարկության հաջորդ օրը Սաակաշվիլին հանդես եկավ նոր հայտարարությամբ, որում ողջունեց Նիկոլ Փաշինյանի վերընտրությունը։ Նրա կարծիքով՝ հայ ընտրողները մերժել են այն սցենարը, որը նա համեմատում էր 2012 թվականի վրացական փորձի հետ։ Սաակաշվիլին ուղղակիորեն հայտարարեց, որ Հայաստանում «Իվանիշվիլիի մոդելը» չաշխատեց, իսկ ընտրությունների արդյունքները որակեց որպես պարտություն այն փորձերի համար, որոնք, ըստ նրա, ուղղված էին ռուսական ազդեցության հետ կապվող քաղաքական ուժի իշխանության գալուն։

Հայաստանում ընտրատեղամասերի փակվելուց հետո՝ ժամը 20:00-ին, վրացական ընդդիմադիր լրատվամիջոցների, Telegram-ալիքների և ակտիվիստների մի մասը սկսեց ակտիվորեն տարածել առաջին էքզիթ-փոլերի տվյալները, որոնց համաձայն՝ Նիկոլ Փաշինյանի գլխավորած «Քաղաքացիական պայմանագիր» կուսակցությունը ստանում էր մոտ 57% ձայն։ Արդեն ժամը 21:00-ի սահմաններում այդ տեղեկությունները լայնորեն տարածվեցին վրացական տեղեկատվական դաշտում։ Կարևոր է նշել, որ խոսքը ոչ թե չեզոք կամ անկախ էքզիթ-փոլերի, այլ Հայաստանի գործող իշխանության և ընտրություններին մասնակցող «Քաղաքացիական պայմանագիր» կուսակցության հետ կապված տվյալների մասին էր։

Վրացական ընդդիմադիր լսարանի մի մասի համար նախնական արդյունքները դարձան Հարավային Կովկասում ռուսական ազդեցության հերթական պարտության խորհրդանիշ։ Փաշինյանի հնարավոր վերընտրությունը նրանց կողմից դիտարկվում էր որպես Հայաստանի՝ Եվրոպայի և ԱՄՆ-ի հետ հետագա մերձեցման և Ռուսաստանից հեռացման հաստատում։

Նախնական արդյունքներին արձագանքած առաջին օտարերկրյա առաջնորդը դարձավ Վրաստանի վարչապետ Իրակլի Կոբախիձեն։ Թբիլիսիի ժամանակով ժամը 23:14-ին նա X սոցիալական ցանցում հրապարակեց Նիկոլ Փաշինյանին և նրա քաղաքական թիմին հասցեագրված շնորհավորական ուղերձ՝ փաստացի շնորհավորելով նրանց ընտրություններում հաղթանակի կապակցությամբ։ Այդ պահին, սակայն, ձայների հաշվարկը դեռ գտնվում էր միայն սկզբնական փուլում․ հաշվարկված էր ձայների 10%-ից պակասը, իսկ քվեարկության արդյունքների վերջնական պատկերը դեռ բացակայում էր։

Միևնույն ժամանակ Հայաստանում քվեարկության արդյունքների շուրջ քաղաքական քննարկումները շարունակվում են։ Ընդդիմադիր ուժերը հայտարարում են ընտրությունների ընթացքում արձանագրված բազմաթիվ խախտումների մասին և այս փուլում չեն ճանաչում արդյունքները։ Քվեարկությանը մասնակցել է 1 476 697 ընտրող (58,97%). սա վերջին խորհրդարանական ընտրությունների ընթացքում երկրում գրանցված ամենաբարձր ցուցանիշն է։

Չնայած նախնական արդյունքների հրապարակմանը՝ վերջնական հաշվարկը շարունակում է մեծ նշանակություն ունենալ։ Հատուկ ուշադրություն է դարձվում Գագիկ Ծառուկյանի գլխավորած «Բարգավաճ Հայաստան» կուսակցության արդյունքին, որին, նախնական տվյալներով, անցողիկ շեմը հաղթահարելու համար պակասում են ընդամենը մի քանի հարյուրերորդական տոկոսային միավորներ (մոտ 60 ձայն):

Կուսակցության՝ խորհրդարան անցնելու դեպքում մանդատների բաշխումը կարող է փոխվել և ազդել Ազգային ժողովում ուժերի հարաբերակցության վրա։ Նախնական տվյալներով՝ դա կարող է «Քաղաքացիական պայմանագրին» զրկել առանց այլ քաղաքական ուժերի աջակցության մի շարք կարևոր որոշումներ ինքնուրույն կայացնելու հնարավորությունից։

Միևնույն ժամանակ ընդդիմության հետագա քայլերը դեռ պարզ չեն։ Հայտնի չէ՝ ընդդիմադիր ուժերը կընդունեն ընտրությունների արդյունքներն ու իրենց մանդատները, թե կընտրեն քաղաքական պայքարի այլ ձևաչափ։ Այս պահին ընդդիմության ներկայացուցիչները սպասում են ձայների վերջնական հաշվարկի ավարտին և ընտրությունների վերջնական արդյունքների հրապարակմանը, որից հետո ավելի պարզ կդառնա նրանց հետագա ռազմավարությունը։

Աղբյուրը՝ vectornews.ge