Ռուսաստանը երկարացրել է Սնոուդենի կացության իրավունքը երեք տարով

Ռուսաստանի իշխանությունները երկարացրել են երկրում ԱՄՆ-ի ազգային անվտանգության գործակալության նախկին աշխատակից Էդվարդ Սնոուդենի կացության իրավունքը երեք տարով՝ մինչև 2020 թվականը: Այդ մասին հայտնում է BBC-ի ռուսական ծառայությունը՝ վկայակոչելով Ռուսաստանի ԱԳՆ-ին:

Այդ տեղեկությունը հաստատել է ամերիկացու փաստաբան Անատոլի Կուչերենան: Նա նաև հայտարարել է, որ Սնոուդենը ունի բոլոր իրավաբանական հիմքերը մոտ ժամանակներս ռուսական քաղաքացիություն ստանալու համար:

Ավելի վաղ ՌԴ արտգործնախարարության ներկայացուցիչ Մարիա Զախարովան Facebook-ում հայտնել է կեցության իրավունքի երկարացման մասին՝ մեկնաբանելով ԿՀՎ-ի տնօրենի նախկին տեղակալ Մայքլ Մորելի հայտարարությունը, որտեղ նա Սնոուդենի արտահանձնումն անվանել է ԱՄՆ նորընտիր նախագահ Դոնալդ Թրամփին «կատարյալ նվեր երդմնակալության համար»:

Սնոուդենը 2013 թվականին արևմտյան ԶԼՄ-ներին փոխանցել էր ԱՄՆ-ի ազգային անվտանգության գործակալության գաղտնի փաստաթղթերը: Դրանից հետո նա ժամանակավոր ապաստան է ստացել Ռուսաստանում: