ԵՄ-ն մեկ տարով երկարացրել է Թուրքիայի դեմ պատժամիջոցները

Եվրամիությունը մեկ տարով երկարաձգել է Թուրքիայի նկատմամբ սահմանափակող միջոցները Միջերկրական ծովում Անկարայի անօրինական գործունեության պատճառով: Այս մասին ասվում է ԵՄ խորհրդի հայտարարության մեջ, որը տարածվել է նոյեմբերի 6-ին Բրյուսելում:

«ԵՄ խորհուրդը որոշում է կայացրել երկարաձգել գործող սահմանափակող միջոցառումների ռեժիմը մինչև 2021 թվականի նոյեմբերի 12-ը` ի պատասխան Արևելյան Միջերկրական ծովում Թուրքիայի չարտոնված հորատման գործողությունների»,- ասվում է հայտարարության մեջ:

Ավելի վաղ Հունաստանի ազգային պաշտպանության նախարար Նիկոս Պանայոտոպուլոսը հայտարարել էր, որ Եվրամիությունը վաղ, թե ուշ ստիպված կլինի պատժամիջոցներ կիրառել Թուրքիայի դեմ Արևելյան Միջերկրական ծովում իր գործողությունների պատճառով:

Ավելի վաղ Հունաստանի արտգործնախարարը հայտարարել էր, որ անհրաժեշտ է անհապաղ դուրս բերել այս ծովային շրջանից բոլոր թուրքական նավերը, ներառյալ՝ ռազմանավերը: