Սնոուդենի ձեռքում են ամերիկյան հատուկ ծառայությունների աշխատանքի սխեմաները

ԿՀՎ նախկին աշխատակից Էդվարդ Սնոուդենի տրամադրության տակ են գաղտնի փաստաթղթեր, որոնք մանրամասն տվյալներ են պարունակում ԱՄՆ Ազգային անվտանգության գործակալության կառուցվածքի ու աշխատանքի մասին. հայտնում է Associated Press-ը` վկայակոչելով Սնոուդենին մոտ` The Guardian-ի թղթակից Գլեն Գրինուոլդին:

Վերջինիս խոսքերով` Սնոուդենի ձեռքում են «շատ կարևոր» փաստաթղթերի կրկօրինակներ, որոնք մանրամասն ներկայացնում են ամերիկյան հատուկ ծառայությունների աշխատանքի մեթոդները: Այդ կրկօրինակները Սնոուդենն արել է, որպեսզի կարողանա ապացուցել, որ իր տարածած ինֆորմացիան համապատասխանում է իրականությանը:

Լրագրողը նշել է, որ Սնոուդենն անձամբ չի ցանկանում հրապարակել այդ փաստաթղթերը, քանի որ ցանկացած մեկը, ով կտեսնի դրանք, կկարողանա հեշտությամբ ներթափանցել գործակալության հետախուզական համակարգ: