Մեկնարկեց հայտնի լեզվաբանի ամուսնու սպանության գործով առաջին դատական նիստը. լուսանկարներ

Էրեբունի և Նուբարաշեն վարչական շրջանների ընդհանուր իրավասության դատարանում քիչ առաջ մեկնարկեց հայտնի լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության գործով առաջին դատական նիստը: Հիշեցնենք, որ Խաչատրյանը սպանվել է 2016թ. հունիսի 4-ին Նուբարաշենի խճուղում մի խումբ անձանց կողմից դաժան ծեծի հետևանքով:

Այս գործով ամբաստանյալի աթոռին են Արտաշես Չիչոյանը, Արարատ Նիկողոսյանը, Արթուր Զաքարյանը, Յուրի Հակոբյանը և Խաչիկ Կոսյանը: Վերջինս ԴԱՀԿ նախկին աշխատակից է: Նրանք բոլորն էլ գտնվում են կալանքի տակ:

Համաձայն մեղադրական եզրակացության՝ Արտաշես Չիչոյանը Խաչիկ Կոսյանի, Արարատ Նիկողոսյանի, Յուրի Հակոբյանի, Արթուր Զաքարյանի և ինքնությունը չպարզված անձի հետ, խուլիգանական դրդումներով, Եղիշե Խաչատրյանին կյանքից զրկելու միասնական դիտավորությամբ, գիտակցելով մեկը մյուսի գործողությունները և մեկը մյուսի գործողությունները լրացնելով, խմբով ձեռքերով և ոտքերով անկանոն հարվածներ են հասցրել Ե.Խաչատրյանի` կենսական նշանակություն ունեցող օրգանի` գլխի, ինչպես նաև կրծքավանդակի և որովայնի շրջաններում և, պատճառելով կյանքի հետ անհամատեղելի մարմնական վնասվածքներ, ապօրինաբար Ե.Խաչատրյանին դիտավորությամբ զրկել են կյանքից: 5 ամբաստանյալները մեղադրվում են նաև խմբի կազմում, անձի առողջությանը միջին ծանրության վնաս պատճառելով, խուլիգանություն կատարելու մեջ:

Դատարան չէին ներկայացել տուժող Էմմա Աբրահամյանը, պաշտպաններ Լիպարիտ Սիմոնյանն ու Միհրան Պողոսյանը: Նրանց բացակայության հիմքով էլ այսօրվա դատական նիստը հետաձգվեց և նշանակվեց փետրվարի 7-ին: