Թե որտեղ կարող է հանգստանալ Վարդան Այվազյանը 10 հազար դրամով. ամանորյա բլից

Yerkir.am-ի ամանորյա հարցերին պատասխանել է ԱԺ ՀՀԿ խմբակցության պատգամավոր Վարդան Այվազյանը:

- 2016-ի զավեշտը:

- Չեմ կարող մտաբերել, գուցե եղել է:

 - Զարմանքը:

- Մեր լրատվության «անաչառությունից» ես զարմանում եմ:

-Նվաճումը:

- Փորձությունների հաղթահարումը, որովհետև 2016 թվականը մեզ համար մի շարք փորձությունների դաշտ էր, մի շարք փորձանքներ բերեց` ապրիլյան պատերազմը, հետո «Սասնա ծռերի» հետ կապված դեպքերը, որի ժամանակ զոհեր տվեցինք: Լուրջ մարտահրավերներ կային, համենայն դեպս, սրա հետ է կապված:

- Ձախողումը:

- Ձախողումը համարում եմ համընդհանուր, որ մենք չենք կարողանում արժանավայել այն կյանքը ստեղծել ՀՀ քաղաքացիների համար, որին մենք արժանի ենք:

- Ցնցումը:

- Ապրիլը և այն դեպքերը, որ տեղի ունեցան այդ ժամանակահատվածում:

- 2016-ին ո՞վ «կապիկություն» արեց:

- Իրենք լավ էլ գիտեն…

- Ով «կաքլորանա» 2017-ին:

- Ահագին ունենք: Պիտի կարողանան. 2017- ին լուրջ փորձություններ են լինելու, պիտի կարողանան 2017-ը բարով-խերով  վայելել, որ հետո կարողանան գալ այստեղ /Ազգային ժողով-խմբ./: Մի շարք կուսակցություններ պիտի փորձեն արդյունք ապահովել ընտրություններին, որ կարողանան այստեղ «աքլորանալ»:

-Ամենաբարետես կին քաղաքական գործիչը :

- Բոլորը նշում են, ո՞նց կարող եմ ես չնշել` մեր արդարադատության նախարարը` Արփինե Հովհաննիսյանը (ժպտում է):

- Երեք բառով բնութագրեք 2016-ը:

- Ծանր, լուրջ մարտահրավերներով և պայքարով:

-2017-ի միակ հույսը:

- Հույսը միակ չի լինում, հույսը միշտ էլ լինում է:

- Ամենահիշարժան տոնակատարությունը:

- Ինձ համար` երեխաներիս ծնունդը, որպես պետական տոնակատարություն` Անկախության օրը, Բանակի օրը: Եվ մի զավեշտալի պատմություն, առաջին անգամ հիմա եմ պատմում: Գնում եմ Վրաստան: Իջևանում կանգնեցի, ասացի` ինձ մի հատ կաղամբ տվեք: Չանաչեցին ինձ և հարցեցին, թե ո՞նց է երկրի վիճակը: Ես էլ ասում եմ` լավ է: Հետո, որ կաղամբը գնեցի, ասացին` փաստորեն, լավ չի ու բավականին վատ է, որ կաղամբ եք գնում: (Ծիծաղում է):

- Ամանորյա լուսավորությամբ զարդարված քաղաքի ո՞ր փողոցն եք սիրում:

- Ամբողջ քաղաքը սիրում եմ, բայց Մալաթիան էլ է շատ սիրուն զարդարված: Քաղաքը չի կարելի չսիրել:

- Տոնածառ զարդարած կա՞ք:

- Իհարկե, այս տարի էլ զարդարել եմ:

- Ձեր երազանքների Ձյունանուշը:

- Այ քեզ պատմություն: Իհարկե` իմ կինը:

- Տոնածառի ու կնոջ միջև ընդհանրություն տեսնո՞ւմ եք:

- Ընդհանրությունն այն է, որ նրանց զարդարում ես` տոնածառը` տարվա մեջ մեկ անգամ, կնոջը` ամեն օր:

- Ամանորյա ձեր երգը:

- Տոնածառի մասին երգ է, հայկական կատարում, հիմա չեմ հիշում:

-Որտե՞ղ կարող եք հանգստանալ կամ նշել Նոր տարին 10 հազար դրամով:

- Մեր տանը: