Ուզում եմ իմ կյանքից ջնջել բոլոր վատ հուշերը. 22-ամյա Լյուսին Ամանորը կդիմավորի անազատության մեջ

22-ամյա Լյուսին (խմբ. անունը փոխված է) արդեն 10 ամիս է` անազատության մեջ է: Գեղեցիկ, խնամված աղջիկը ճաղերի հետևում է հայտնվել բնակարանային գողության համար, սակայն  3 տարի ազատազրկման դատապարտված Լյուսին մեղքը չի ընդունում: «Չկանխատեսված մի բան է ստացվել»,- ասում է նա:

Լյուսին մինչև դատապարտվելը դիմահարդարմամբ ու վարսահարդարմամբ է զբաղվել:  Կալանավայրում էլ պարապ չի մնում` կին դատապարտյալներին է հարդարում: Ասում է՝  իր աշխատանքից գոհ են:  

«Ընդհանրապես պատկերացում չեմ ունեցել  կալանավայրից, երբևիցե չեմ մտածել, որ այստեղ կհայտնվեմ»,- ասում է նա՝ միևնույն ժամանակ նշելոց, որ կալանավայրից դժգոհ չէ: «Էս մարդիկ ամեն ինչ անում են, որ մենք ուղղվենք»,- բացատրում է նա:

Լյուսիի խոսքով՝  ընտանիքում, բնականաբար, ծանր են տանում իր՝  անազատության մեջ գտնվելու հանգամանքը, բայցև իր կողքին են, հավատում ու սպասում են:

Աղջիկը վստահ է՝ կկարողանա հաղթահարել ու ջնջել կյանքի այս էջը: «Ստեղից հետո ուզում եմ իմ կյանքից ամբողջությամբ ջնջել բոլոր վատ հուշերը: Միայն այն, որ ես անազատության մեջ  եմ, ինձ համար արդեն իսկ վատ է: Պետք է սկսեմ ամեն ինչ նորից, ավելի հետաքրքիր էջից»,- ասում է նա:

 Լյուսին համոզված է՝ դժվար չի լինի իր համար վերադառնալ հասարակություն: «Ես շատ աշխույժ, էներգիայով լի անձնավորություն եմ, չեմ կարծում, որ խնդիր լինի»,- անկեղծանում է նա, սակայն երբ  դարձյալ մտածում է, որ Նոր տարին ընտանիքից հեռու է անցկացնելու, կոտրվում է: