Պետք է հաշվի առնել բազմաթիվ հանգամանքներ և նոր գալ որոշակի վերջնական որոշման. Մնացականյանը՝ Հայաստան-Արցախ ռազմաքաղաքական դաշինքի մասին

Կարծում եմ, որ յուրաքանչյուր հարց անհրաժեշտ է զգուշավոր և մանրամասն քննել. «Հաղթանակ» զբոսայգում  News.am-ի հետ զրույցում անդրադառնալով «Հայաստան-Արցախ» ռազմաքաղաքական դաշինքի կնքմանը և դրա հետ կապված ստորագրահավաքին՝ նշել է  ՀՀ ԱԳ նախարար Զոհրաբ Մնացականյանը:

«Պետք է զգուշավոր և մանրամասն քննել, քննարկել հասարակական քննարկումներում, հաշվի առնել բազմաթիվ հանգամանքներ և նոր գալ որոշակի վերջնական որոշման»,- ընդգծել է  նա:

Ըստ Մնացականյանի՝ այսօր բոլոր առումներով ունենք խորը կապ ՀՀ-ի և Արցախի միջև՝ հիմնվելով այն սկզբունքի վրա, որ «Լեռնային Ղարաբաղը մեր հայրենակիցների հայրենիքն է, որտեղ ապրում են մեր հայրենակիցները»:

«Իսկ հայրենակիցները ինչ-որ հավաքական, տեսական հասկացություն չէ, այլ՝ կոնկրետ մարդիկ` անվտանգային իրենց կոնկրետ հարցերով, և Հայաստանը եղել և մնում է Լեռնային Ղարաբաղի և Արցախի բնակչության պաշտպանության միակ երաշխավորը: Եվ թե ի՞նչ գործիքներով ենք դա անում, միշտ եղել է, շարունակական հարց է: Մենք արդեն ունենք բավարար և հսկայական գործիքներ՝ ապահովելու մեր գործառույթը, այն է՝ երաշխավորել ԼՂՀ-ի անվտանգությունը: Մնացած նոր գործիքները կարող ենք քննարկել, գնահատման խնդիր է»,- ասել է նա: