Հաշվի առնել կենսական նշանակություն ունեցող մեր հայացքները. Թուրքիայի ԱԳՆ-ն սարսափած է Բունդեսթագի որոշումից

Թուրքիայի ԱԳ նախարարությունը Գերմանիայի Բունդեսթագի կողմից Հայոց ցեղասպանության վերաբերյալ բանաձևի ճանաչման մասին գրավոր հայտարարությամբ է հանդես եկել՝ «ամոթալի» որակելով Գերմանիայի որոշումը:

Մի քանի կետերից բաղկացած հայտարարության մեջ Թուրքիայի ԱԳՆ-ն դատապարտել է Գերմանիային, ինչպես նաև «պատմության քաղաքականացումը, անցյալի մասին ազատ խոսելն արգելելը»:

 Մասնավորապես նշվել է, որ Բունդեսթագի ընդունած բանաձևը «իրավունքի ոտնահարման օրինակ» է։

Ուշագրավ հատվածներից մեկն էլ հետևյալն է. «Ակնկալում ենք, որ Գերմանիան, որի հետ դաշնակից ենք և Եվրոպայի ապագայի համար սերտ համագործակցում ենք, հաշվի կառնի թե’ մեր երկկողմ և թե’ Թուրքիա-Եվրոպա հարաբերությունների ապագայի համար մեր՝ կենսական նշանակություն ունեցող հայացքներն ու զգայունությունը»:

Հայտարարության վերջում ԱԳ նախարարությունը նշել է նաև, որ Գերմանիայում իրենց դեսպանը հետ է կանչվել Թուրքիա՝ այդ հարցով խորհրդակցությունների համար: