Որպես ՀՅԴ ներկայացուցիչ՝ լավագույնս կարդարացնեմ ինձ վստահված պատասխանատվությունը. Լիբանանում հայ նախարար

Լիբանանում զբոսաշրջության նորանշանակ նախարար, ՀՅԴ անդամ Ավետիս Կիտանյանը հարցազրույցներ է տվել լիբանանյան տարբեր լրատվամիջոցների, որոնց ընթացում շեշտել է, որ ինքը կգործի «Ժողովրդի հետ, ժողովրդի համար» կարգախոսով:

Ինչպես տեղեկացնում է Aztagdaily-ն, Կիտանյանը նշել է, որ զբոսաշրջության նախարարությունը մարտահրավեր է իր համար՝ հավելելով, որ ինքն ունի աշխատանքային ծրագիր՝ գրավելու օտար և հատկապես Պարսից ծոցի երկրների զբոսաշրջիկների ուշադրությունը:

«Եթե մենք չկարողանանք լուծումներ գտնել քաղաքացիների դիմագրաված հիմնական հարցերին, ապա երկրի իշխանությանը մեր մասնակցությունը անարժեք կլինի»,- ասել է նա՝ ընդգծելով, որ ինքը ծառայելու է բոլոր քաղաքացիներին:

Կիտանյանը նշել է, որ ինքը լիբանանահայության զավակներից է, և հավելել. «Հույս ունեմ, որ կառավարության մեջ, որպես ՀՅԴ ներկայացուցիչ, լավագույնս կարդարացնեմ իմ անձին վստահված պարտականությունն ու պատասխանատվությունը»:

Նշենք, որ հինգշաբթի օրը Լիբանանի զբոսաշրջության նախարարության կենտրոնում տեղի կունենա նախարարության հանձնումի և ստանձնումի պաշտոնական արարողություն նախարարներ Միշել Ֆարաոնի և Ավետիս Կիտանյանի միջև: