Վարչապետից չի վիրավորվել

Yerkir.am-ը ՀՀ սփյուռքի նախարար Հրանուշ Հակոբյանից այսօր հետաքրքրվեց՝ որպես կուսակցական` վիրավորված չէ՞ վարչապետ Կարեն Կարապետյանի այն հայտարարությունից, թե, անդամակցելով ՀՀԿ-ին, հեղինակազրկվում է:

«Վարչապետն ունի իր կարծիքը և կարող է արտահայտել այն: Ուրիշ մեկն ունի իր կարծիքը: Մեր կուսակցությունն ամենամասսայականն է, բնականաբար, դուք ինձանից լավ գիտեք: Որտե՞ղ եք տեսել, որ հավաքես 150 հազար մարդ, ու բոլոր շերտերից էլ չլինեն մարդիկ: Մեկը կարող է այնպիսի քայլ անել, որը վիրավորական լինի, բայց, ընդհանուր առմամբ, մենք այսօր պետք է փորձենք կուսակցության հեղինակությունը բարձրացնել և կուսակցական ղեկավարներին օգնել, որ նրանք ևս կարողանան իրենց առջև դրված խնդիրներն իրականացնել»,- ասաց նախարարը:

Մեր պնդող հարցին, թե, ի վերջո, վիրավորվե՞լ եք, թե՞ ոչ , Հրանուշ Հակոբյանը, ձեռքը սրտին դրած, շատ հուզական ձայնով պատասխանեց, որ կվիրավորվեր այն դեպքում, երբ ինքն այնպիսի արարք թույլ տար, որը կարող էր հեղինակազրկել վարչապետին:

«Ընդհանուր առմամբ, ես անցնող իմ կյանքի բոլոր ճանապարհներին որևէ անօրինականություն, խարդախություն, անշնորհքություն չեմ արել, բայց սխալներ, իհարկե, կան: Այդ առումով` չեմ վիրավորվի, որովհետև ես ինքս որևէ բան թույլ չեմ տա իրեն վիրավորելու համար»,- յուրօրինակ մեկնաբանություն արեց նախարարը: