Ռուսաստանից մեծ քանակությամբ էժան գարեջուր է ներմուծվում Հայաստան. Բալասանյան

Այսօր ՀՀԿ համագումարի մասնակից` Գյումրու քաղաքապետ Սամվել Բալասանյանից հետաքրքրվեցին, թե ինչպես կմեկնաբանի ՏՄՊՊՀ կողմից «Երևան գարեջուր» ընկերության տուգանվելու փաստը: Նշենք, որ «Երևան գարեջուր»-ը հիմնադրել է Սամվել Բալասանյանը:

Գյումրու քաղաքապետը նշեց, որ ինքը չի զբաղվում այդ բիզնեսով, բայց տեղյակ է, որ այդտեղ խախտումներ չեն եղել: Նա սխալ է համարում տեղական արտադրողներին տուգանելու և նրանց վրա ճնշում գործադրելու գործելաոճը, քանի որ տեղական արտադրողը հազիվ է դիմանում մրցակցությանը: «Ռուսաստանից մեծ քանակությամբ էժան գարեջուր է ներմուծում Հայաստան: Պետք է, չէ՞, խթանենք մեր տեղական արտադրողներին»,- ասաց Բալասանյանը:

Սակայն նա խուսափեց գնահատական տալ Արտակ Շաբոյանի գլխավորած ՏՄՊՊՀ գործունեությանը: