Արդյունավետ աշխատելու դեպքում կարող ենք տեղ զբաղեցնել Իրանի շուկայում. Կարեն Կարապետյան

Այսօր` կառավարության նիստի օրակարգին անցնելուց առաջ, վարչապետ Կարեն Կարապետյանը հանձնարարականներ տվեց արտահանման վերաբերյալ: Գյուղատնտեսության և տնտեսական զարգացման և ներդրումների նախարարություններին հանձնարարեց արտահանման խթանման ուղղությամբ ներկայացնել որոշման նախագիծ և ստեղծել աշխատանքային խումբ: Վարչապետը հանձնարարեց աշխատել իրանական շուկայի հետ և հայկական արտադրանքը Իրանի շուկա արտահանել դյուրացված կարգով:

«Ունենք հարևան մեծ շուկա, որն ունի մեծ պահանջարկ: Դրանում մենք չնչին տոկոս ենք զբաղեցնում: Էֆեկտիվ աշխատելու դեպքում կարող ենք այդ շուկայում տեղ զբաղեցնել: Հանձնարարում եմ տնտեսական զարգացման և ներդրումների նախարարությանը` քննարկել շահագրգիռ մարմինների հետ Իրանի սահմանակից տարածքում ազատ տնտեսական գոտի հիմնելու հնարավորությունը և ներկայացնել առաջարկությունը»,- ասաց վարչապետը:

Նա հանձնարարեց նաև կառավարության աշխատակազմի ղեկավար-նախարարին` իրավաբանական անձանց լիցենզիա տրամադրելու հետ կապված, ներկայացնել օրենսդրական փաթեթ` նպատակով, որ իրավաբանական անձանց լիցենզիան տրամադրվի բացառապես էլեկտրոնային եղանակով, բացառությամբ պաշտպանության և միջուկային էներգետիկայի ոլորտին տրվող լիցենզիաները` հաշվի առնելով, որ դրանցում լինում են պետական գաղտնիք պարունակող տարրեր: