Գնացեք Վահագնի թաղամաս, տեսեք`գեներալիտետը ինչ դղյակներ է կառուցում. պատգամավոր

Այսօր ԱԺ հերթական քառօրյա նիստում շարունակվում է բանակում փոխհատուցման համակարգն ապահովող հիմնադրամի ստեղծման հարցը: Պատգամավորները հանդես են գալիս ելույթներով:

Ելույթ ունեցավ նաև ԲՀԿ խմբակցության ղեկավար Նաիրա Զոհրաբյանը: Նա նախ հայտարարեց, որ ԲՀԿ-ն օրինագծին կողմ է քվեարկելու: Պատգամավորի խոսքով` պետք չէ դեմագոգիայով զբաղվել ու ասել, թե նրանք, ովքեր դեմ են այս օրինագծին, չեն ուզում օգնել բանակին: Խնդիրը վստահության գործակցի մեջ է:

Զոհրաբյանն անդրադարձավ բանակի կոռուպցիոն խնդիրներին: «Գնացեք Վահագնի թաղամաս, տեսեք, թե ձեր գեներալիտետը, պաշտպանության ոլորտի բարձրաստիճան պաշտոնյաներն ինչ դղյակներ են կառուցում: Ես անշարժ գույքի մասնագետ չեմ, բայց, վիզուալ նայելով, կարող ենք ասել, որ խոսքը հսկայական գումարների մասին է: Որտեղի՞ց: Նայում ես հայտարարագրերը, նշված է, թե տոկսով փող են տալիս, փոխառություն են ստանում, նվիրատվություն են ստանում իրենց մամաներից ու պապաներից: Ուսումնասիրում ես մամաների ու պապաների կենսագրությունը, տեսնում ես, որ ոչ մեկն էլ միլիոնատեր չէ: Այնպես որ` մի' ասեք, թե փաստեր չկան»,- ասաց պատգամավորը:

Նշենք, որ Վահագնի թաղամասում մեծ առանձնատուն է կառուցում պաշտպանության նախկին նախարար Սեյրան Օհանյանը: