Հայաստանում ոստիկանների թիվն «ըսկի էլ շատ չէ». ՀՀ փոխոստիկանապետ

Գալիք տարվա բյուջեի նախագծի քննարկումների ընթացքում, այսօր խորհրդարանում փոխոստիկանապետ Վարդան Եղիազարյանն ասել է, որ «Սասնա ծռեր» խմբավորման կողմից ՊՊԾ գնդի գրավման ժամանակ ոստիկանությունը մեծ վնասներ է կրել` 300 մլն դրամի չափով, սակայն կառավարությունը արտաբյուջետային միջոցների հաշվին փոխհատուցել է միայն 100 մլն դրամի չափով:

Հաջորդ տարի ՀՀ ոստիկանության պահպանման ծախսերը նախատեսվել են 36,413.0 մլն դրամի չափով, որն ամբողջությամբ ուղղվելու է ընթացիկ ծախսերի ֆինանսավորմանը: 2016թ. պետական բյուջեի համեմատ նախատեսվում է ֆինանսավորումն ավելացնել 3,2 մլն դրամով։

Փոխոստիկանապետն անդրադարձել է նաեւ այն հարցին, թե արդյոք շա՞տ են Հայաստանում ոստիկանները: «Միշտ շահարկվում է, թե Հայաստանում ոստիկանների թիվը չափազանցված է: Ըսկի էլ էդպես չի»,- հայտարարեց փոխոստիկանապետ Եղիազարյանը` նշելով, որ ՀՀ-ում 100 հազար բնակչին ընկնող ոստիկանների թիվը պակաս է Հունգարիայից, Բուլղարիայից, Մակեդոնիայից։ 

Իսկ, թե Հանրապետությունում ի վերջո որքա՞ն ոստիկան կա, Եղիազարյանը հրաժարվեց պատասխանել` շեշտելով, որ դա գաղտնիք է: