Մեկ արագաչափ-տեսանկարահանող սարքն արժե մոտ 11 հազար եվրո

Այսօր ԱԺ-ում 2017թ. բյուջեի քննարկումների ժամանակ ոստիկանության բյուջեի մասով զեկուցում էր ոստիկանության պետի տեղակալ Վարդան Եղիազարյանը: ԱԺ պատգամավոր Խաչատուր Քոքոբելյանը հարցրեց, թե որքան է ոստիկանների թիվը: Վարդան Եղիազարյանը, բնականաբար, չպատասխանեց այդ հարցին` ասելով, թե միշտ շահարկվում է, որ ոստիկանների թիվը շատ է:

«Իսկի էլ այդպես չի, մեր ոստիկանների թվի տեսակարար կշիռը ցածր է այնպիսի երկրներից, ինչպիսիք են Բուլղարիան, Սլովենիան, Սերբիան, Չեխիան, համադրելի ու մոտ է Էստոնիայի, Ավստրիայի, Սլովակիայի հետ: Մենք համաձայն չենք լուրերի ու հասարակական կարծիքի հետ, որ Հայաստանում իբր թե չափից ավելի ոստիկանական ուժեր կան»,- ասաց նա:

Միքայել Մելքումյանը հետաքրքրվեց արագաչափերից: Նշվեց, որ արագաչափերի վերաբերյալ պայմանագիրը գործում է մինչև 2036 թվականը, ու դրա շրջանակներում որոշակի պայմանավորվածություններ կան: Արագաչափերի գործարկումը, նրա տեղեկացմամբ, նվազեցրել է ճանապարահատրանսպորտային պատահարների թիվը:

Փոխոստիկանապետի խոսքով՝ նվազում են յուրաքանչյուր արագաչափի վրա ընկող գումարները, ինչպես նաև տուգանքները: Հայաստանում, այս պահի դրությամբ, տեղադրված են 179 լուսանկարահանող արագաչափ սարքեր, որոնցից 91-ը` Երևանում, որոնք վերահսկում են 123 խաչմերուկներ: Հաջորդ տարի ևս 12 սարք կտեղադրվի:

Վ. Եղիազարյանի խոսքով` 2017-ին նախատեսվում է ներդնել նաև շրջիկ տեսանկարահանող սարքերի ծրագիրը, որի պիլոտային փուլն արդեն իրականացվել է:

Պատգամավոր Խաչատուր Քոքոբելյանի հարցին, թե որքա՞ն արժե մեկ տեսանկարահանող սարքը, ոստիկանության ղեկավար կազմի ներկայացուցիչներից մեկը պատասխանեց` 10-11 հազար եվրոյի սահմաններում: