«Լրագրողների դպրոցում» դանակահարված 22-ամյա երիտասարդը մահացավ

«Արմենիա» բժշկական կենտրոնում մահացել է  Սևան քաղաքի բնակիչ, 22-ամյա Լևոն Սահակյանը: Հայտնում է shamshyan.com-ը: 

Ինչպես  տեղեկացրել էր  Yerkir.am-ը ,  հոկտեմբերի 19-ին՝ ժամը 23.20-ին, «Արմենիա» ՀԲԿ-ից հաղորդում է ստացվել առ այն, որ «ձախ կրծքավանդակի և աջ ազդրի կտրած-ծակած վերքեր» ախտորոշմամբ բժշկական օգնության է դիմել 1994թ. ծնված Լևոն Սահակյանը։ Տուժածը հայտարարել էր՝ նախկին Շիրակ հանրախանութի մոտ վայր է ընկել: Նախնական տվյալների համաձայն՝ երիտասարդին կտրող-ծակող առարկայով մարմնական վնասվածքը պատճառվել է Թերլեմեզյան 3 հասցեում: Կատարված զննությամբ նշված հասցեի բակում և դպրոցի ներսում հայտնաբերվել են արյունանման հետքեր, իսկ դպրոցի տնօրեն Վ.Ղազարյանի աշխատասենյակում՝ արյունանման հետքերով ծալովի դանակ։

Դեպքի առթիվ Աջափնյակ և Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 1-ին մասով։ Կատարված քննչական գործողությունների արդյունքում պարզվել են հանցագործության մի շարք հանգամանքներ, շարժառիթը, և սպանության փորձի կասկածանքով ձերբակալվել է Վան Ղազարյանը `«Վան» հեռուստաստուդիայի տնօրենը:

Հայտնի էր  դարձել, որ Ղազարյանի և Սահակյանի միջև վիճաբանության և դրան հաջորդած դանակահարության պատճառը եղել է Լևոնի նշանածին աշխատավարձ չվճարելը: Տեղեկություններ կան, որ հենց այս հարցով էլ Լևոնը գնացել էր նշանածի տնօրենի՝  Վահան Ղազարյանի մոտ: