Պաշտոնի նշանակում եմ այն մարդկանց, ում վստահում եմ. Կարեն Կարապետյան

Այսօր ԱԺ արտահերթ նիստում վարչապետ Կարեն Կարապետյանը ներկայացնում էր կառավարության ծրագիրը:  ԲՀԿ խմբակցության պատգամավոր Միքայել Մելքումյանը հարց ուղղեց վարչապետին, թե ինչո՞ւ են Հայաստանում ներդրումները այդքան քիչ:

Վարչապետը պատասխանեց, որ բազմաթիվ պատճառներ կան` երկրի փոքրությունը, լոգիստիկ դաշտը, հարկային-մաքսային դաշտը, աշխարհաքաղաքական վիճակը, պատերազմական գործոնը  և այլն: «Փող դնելու ռիսկայնությունը բարձր է»,- ասաց նա:

Կարապետյանի խոսքով` այսօր բիզնես միջավայրն էլ է հուսահատված, այդ իսկ պատճառով պետք է հիմնադրամ ստեղծեն` նրանց աջակցելու համար:

ՕԵԿ-ական Հեղինե Բիշարյանը հարցրեց ծանոթ-բարեկամների պաշտոնների նշանակման մասին` ասելով, որ կառավարությունում աշխատում են հենց վարչապետի բարեկամները, որոնք էլ իրենց հերթին են պաշտոնի տեղավորում իրենց ծանոթ-բարեկամներին: Պատգամավորը հարցրեց նաև ՊՈԱԿ-ների կրճատման մասին, նրան հետաքրքրում էր վարչապետի տեսակետը գործազրկության ավելացման մասին:

«Չեմ բացառում, որ երբևիցե պաշտոնի կնշանակեմ իմ բարեկամին, եթե նա արժանի է, բայց առ այսօր մի բարեկամ չկա, որին նշանակել եմ: Եթե իմ գործընկերներին, որոնց ես նշանակել եմ, անվանենք բարեկամ, ուրեմն` այո, ես նշանակում եմ այն մարդկանց, ում վստահում եմ»,- ասաց նա:

Ինչ վերաբերում է կրճատումներին, վարչապետը հռետորական հարց ուղղեց. «Եթե կրճատում ենք անարդյունավետ աշխատողին, ապա դա ի՞նչ է, գործազրկությո՞ւն»: