Վարչապետը հստակեցնում է գնումների ոլորտի հանձնարարականները

Այսօր կառավարության նիստում վարչապետ Կարեն Կարապետյանը հանձնարարականներ հնչեցրեց:

Առաջինը վերաբերում էր պետական գնումներին:  Ֆինանսների նախարարին հանձնարարվեց  երկշաբաթյա ժամկետում ներկայացնել գնումների մասնակի կենտրոնացման վերաբերյալ իրավական ակտի նախագիծ, որը պետք է հիմնված լինի հետևյալ կանոնների վրա՝ պարբերական սպառման բնույթ ունեցող ապրանքներ, ծառայությունների կամ աշխատանքների գնումները ամբողջությամբ պետք է իրականացվեն կենտրոնացված եղանակով՝ մասնագիտացված կառույցի կողմից պատվիրատուների համախմբված պահանջարկի հիման վրա: Գնումների ցանկը կսահմանվի կառավարության որոշմամբ:

Երկրորդ` պայմանագրի կատարման արդյունքների ընդունման գործընթացը կարգավորել դարձնել էլեկտրոնային, պայմանագրի գծով ընդունման հանձնման ակտերը, վճարման ընթացակարգերը կստացվեն ու կհաստատվեն էլեկտրոնային եղանակով:

Մանրամասնելով հանձնարարականը` Կարեն Կարապետյանն ասաց, որ ունեն գնումներ ապահովող բազմաթիվ ձեռնարկություններ, որոնցից պարբերաբար գնում են նույն բաները: «Նախարարությունները, գերատեսչությունները հանձնարարարել ենք մի կառույցի, դա, ի վերջո, գալու է ծախսափակման, և բյուջեի վրա որևիցե գումար չի նստելու, երբ որ ամբողջ գործընթացը կազմակերպենք: Ինչ վերաբերում է սպեցեֆիկ գնումներին, որտեղ պետք է մասնագիտացված մոտեցում, մենք այս հանձնարականի վերջում կկազմակերպենք նաև դա, որպեսզի յուրաքանչյուր գնորդ համոզված լինի, որ գնում է այն, ինչ որ իրեն պետք է»,- ասաց վարչապետը: