Ուրիխանյանը պատրաստվում է դժոխքի վերածել Շարմազանովի կյանքը

Երեկ ԱԺ հայտարարությունների ժամին պատգամավոր Տիգրան Ուրիխանյանը ոչ պարկեշտ բառապաշարով հանդես եկավ խորհրդարանական ամբիոնից՝ քաղաքագետ Ստյոպա Սաֆարյանին մեղադրելով իշխանության դրածո լինելու մեջ: Ուրիխանյանի ելույթից հետո ԱԺ փոխխոսնակ Շարմազանովը հայտարարեց, թե Ուրիխանյանը ճիշտ կանի` պարկեշտ վարք դրսևորի և օգտագործի խորհրդարանին հարիր բառապաշար:

Շարմազանովի հորդորը վրդովեցրել էր Ուրիխանյանին: Նա հայտարարեց, թե պատրաստվում է դժոխքի վերածել Շարմազանովի կյանքը:

Այս հայտարարությունից հետո լրագրողները Ուրիխանյանին հանդիպեցին Շարմազանովի սենյակում: Իսկ թե ինչո՞ւ էր նա այնտեղ, պարզել չհաջողվեց, քանի որ պատգամավորը չցանկացավ խոսել այդ մասին:

«Ինձ չեն կարող կանչել այնտեղ, որտեղ ես չեմ ուզում լինել: Շարմազանովը պետք է ներողություն խնդրի ինձնից»,- ասաց Ուրիխանյանը:

Նա հայտարարեց, թե իր պայքարին նոր շունչ է հաղորդելու և ազատելու է նրանցից, ովքեր կործանում են ժողովրդի կյանքը:

Հարցին, թե վերահաստատելո՞ւ է հրաժարականի դիմումը, Ուրիխանյանը հրաժարվեց պատասխանել:

«Ես վերանայելու եմ իմ քաղաքական գործունեությունը, դիմումի հետ դա կապ չունի: Վերանայելու եմ` ռադիկալ պայքարի հարթության տեսանկյունից»,- ասաց պատգամավորը:

Ի դեպ, Ուրիխանյանը նշեց՝ իրեն ուրախացնում է, որ իր երեկվա ելույթից հետո ոմանք նյարդայնացած են: