Ֆինանսների նախարարը հորդորում է նախարարներին` «պահպանողական լինել ծախսերի մեջ». լարվածություն կա

Այսօր կառավարության նիստում ԱԻ նախարար Արմեն Երիցյանը ներկայացրեց որոշման փոփոխություն, որը կանոնակարգում է ռադիոլոկացիոն դիտարկումներ և հակակարկտային ներգործության աշխատանքներ իրականացնող մասնագետների աշխատանքը և աշխատանքի վարձատրությունը:

Առարկություն ուներ ֆինանսների նոր նախարար Վարդան Արամյանը: «Հույս ունեմ, որ այս որոշումը լրացուցիչ ծախսեր չի առաջացնի, քանի որ պահուստային ֆոնդն այսօրվա դրությամբ սպառվել է: Նոր առաջարկ կներկայացնենք վերաբաշխման վերաբերյալ: Սակայն խնդրում եմ գերատեսչությունների ղեկավարներին, որ խիստ պահպանողական լինեն` վերաբաշխումների հետ կապված, որովհետև մենք ունենք լուրջ լարվածություն»,- ասաց նա:

Վարչապետը հավելեց. «Պարո\'ն Երիցյան, նախանիստին այս հարցերը քննարկվում են, չէ՞, ֆինանսների նախարարն էլ ներկա է լինում: Ինչ եմ խնդրում իմ գործընկերներին` մաքսիմալ պատրաստված ներկայացնել որոշումները»: