«Կյանքս՝ Հայրենիքիս». Լիբանանում տեղի է ունեցել ՀՅԴ 3-օրյա բանակում

Աղբյուրը՝ Aztagdaily

ՀՅԴ Լիբանանի երիտասարդական միութեան Կեդրոնական վարչութեան կազմակերպած «Կեանքս հայրենիքիս» նշանաբանը որդեգրած եռօրեայ բանակումը սկիզբ առաւ ուրբաթ, 23 սեպտեմբեր 2016-ին: Առաւօտեան հանրակառքերը «Շաղզոյեան» կեդրոնէն ուղղուեցան դէպի Թուրզայա-Ժիպէյլ` վերջերս վերակարգաւորուած  «Թռչնոց բոյն»-ի ամառնային բանակավայրը: Բանակումին մասնակցեցան շուրջ 130 ԼԵՄ-ականներ: Բանակումին ծրագիրը կ՛ընդգրկէր դաստիարակչական օրակարգեր` զրոյց, դասախօսութիւն, զարգացման մրցում, ինչպէս նաեւ  մարզական  այլազան օրակարգեր: Երեք օրերու  ընթացքին ԼԵՄ-ականները օժտուեցան տարբեր բնոյթի  գիտելիքներով, որոնց բոլորին նպատակն էր դաշնակցական երիտասարդին մօտ հաստատել հայրենիքին նկատմամբ անսակարկ նուիրումի սկզբունքը:

Բանակումի երրորդ օրուան ընթացքին ԼԵՄ-ականներուն այցելեց ՀՅԴ Բիւրոյի ներկայացուցիչ Հրանդ Մարգարեան: Ան  զրոյց-դասախօսութեան մը ընդմէջէն  ներկայացուց  Հայ յեղափոխական դաշնակցութեան վերջին 25-ամեայ գործունէութիւնը` շեշտը դնելով հայութեան  անսահման կարիքներուն հասնելու դաշնակցական մարդու եւ յատկապէս երիտասարդի միշտ պատրաստ ըլլալու անհրաժեշտութեան վրայ, հայրենիքին թէ սփիւռքի տարբեր շրջաններուն մէջ:

Մասնակից  ԼԵՄ-ականները կարգապահութեամբ եւ լրջութեամբ հետեւեցան բոլոր օրակարգերուն: Բանակումը վերջ գտաւ կիրակի, 25 սեպտեմբեր 2016-ին, կէսօրէ ետք ժամը 4:00-ին: Դաշնակցական երիտասարդները  ներշնչուած եւ բարձր տրամադրութեամբ վերադարձան իրենց կեդրոնները` անգամ մը եւս վերանորոգելով  հայրենիքին ծառայելու իրենց անսակարկ  ուխտը: