Երանի մենք էլ բանակ ու ոստիկանություն չունենայինք. ՀՀԿ խմբակցության պատգամավոր

ՀՀԿ խմբակցության պատգամավոր Տաճատ Վարդապետյանը չի կարծում, որ էական փոփոխությունը կախված է լինելու նախարարությունների անվանումների  փոփոխության հետ, այնուհանդերձ, համամիտ է դրա հետ:

 Yerkir.am-ի հետ զրույցում նա նշեց, որ Սփյուռքի նախարարության կարևորագույն գործառույթը հայրենադարձության խնդիր լուծելն է: «Լինելով ջավախքցի` չեմ ուզում, որ Ջավախքը դատարկվի: Մնացած բոլոր երկրներից կցանկանայի, որ մեր հայրենակիցները հայրենադարձվեն, սա կարելի է ողջունել և ուրախանալ»,- ասաց պատգամավորը` հավելելով` հայրենադարձություն հավելվածը լրացուցիչ իմաստ կտա նախարարության գործառույթներին:

Վարդապետյանի խոսքով` ինքն անձամբ Սփյուռքի նախարարության ստեղծման ջատագովներից է եղել և չի ցանկանա, որ նախարարությունը վերանա: «Ես`որպես ջավախքցի, կարևորել եմ այդ գերատեսչության հնչեղությունը, որ նախարարությունը մակարդակ ունենա: Ինքս էլ առաջարկությամբ եմ այն ժամանակ հանդես եկել»,- ասաց նա:

Պատգամավորը նշեց, որ եթե ցանկացած նախարարության, գետրատեսչության գործունեության մեջ փնտրում ենք կատարյալը, դժվար հանդիպենք, սակայն դրվատանքի խոսքեր պետք է ասել Սփյուռքի նախարարության հասցեին, չնայած կարելի էր ավելին անել, ավելի լուրջ ձեռքբերումներ ունենալ հայրենադարձության խթանման գործում: Բայց դա պատգամավորը չկապեց նախարարության թերացման հետ, այլ համարեց, որ իրավիճակն է այդպիսին:

«Ես դրական եմ նայում, որ լինի Սփյուռքի և հայրենադարձության նախարարություն: Երանի բուռն հայրենադարձության արդյունքում այլևս չունենանք Սփյուռքի նախարարության կարիքը: Ես կցանկանայի, որ ոստիկանություն  էլ չունենանք, այնպիսի պայմաններ լինեն, այնպիսի քաղաքացիական բարձր կարգուկանոն լինի, որ ոստիկանության կարիք էլ չլինի: Երկրներ կան, որ բանակ էլ չունեն, երանի մենք էլ չունենայինք դրա կարիքը: Դրանք մարդկային կյանքը ավելի դյուրին դարձնելու, հասարակական կյանքը ավելի մատչելի դարձնելու նպատակներ են: Թող Սփյուռքի նախարարություն էլ չունենանք, եթե հայրենադարձության խնդիրը լուծվեց»,- նշեց նա:

Վարդապետյանը նշեց, որ համաձայն չէ տարածված այն կարծիքին, որ Սփյուռքի նախարարությունն ավելորդ է: Մեր խնդրանքին` նշել մեկ կարևոր նախագիծ, որ իրականացրել է Սփյուռքի նախարարությունն իր գործունեության ընթացքում, պատգամավորը նշեց «Արի տուն» ծրագիրը:

Մեզ հետ զրույցում պատգամավորն անդրադարձավ նաև էկոնոմիկայի նախարարության անվանափոխմանը և նշեց, որ մենք ունեցել ենք այնպիսի նախադեպ, որ էկոնոմիկայի և ֆինանսների նախարարությունները համատեղ են եղել: «Ֆինանսների և էկոնոմիկայի նախարարությունները մեկ միացվել են, մեկ` առանձնացվել, իսկ այս անվանումը շատ տրամաբանական է` ներդրումների և զարգացմանն աջակցման, այստեղ նույնպես իմաստ կա, բայց անվանումները պետք է անպայման համապատասխան բովանդակություն ունենան իրենց գործունեության հետ: Կարևորը աշխատելն է և հաջողություններ ունենալը այդ ոլորտներում»,-ընդգծեց  Վարդապետյանը: