Մենք փառաբանում ենք այն ուժի գործադրումը, որը արդարացում չունի. Ռուբեն Բաբայան

Հ. Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանն իր մեղավորությունն է տեսնում նրանում, որ հասարակությունը գնալով ավելի ու ավելի ագրեսիվ է դառնում:

«Ագրեսիվությունը ուժեղացել է անգամ կենցաղային մակարդակով, մենք փառաբանում ենք այն ուժի գործադրումը, որը արդարացում չունի, վատ գիտենք պատմությունը. զենքը, բռնությունը ծնում են զենք և բռնություն: Անգամ եթե այս վիճակը հանգուցալուծվի զինյալների պահանջով, արդյոք համոզվա՞ծ ենք, որ դրական արդյունք կլինի, չէ որ դա ստեղծում է նախադեպ, նման ձևով հարցերը լուծելու համար, մինչդեռ կարմիր արյան գիծը չպետք է անցնել: Ինչո՞ւ մարդու կյանքը դադարեց դառնալ գերագույն արժեք»,- լրագրողների հետ քննարկման ժամանակ ասաց Ռուբեն Բաբայանը՝ մեջբերելով Տոլստոյի խոսքերը. «Արա այն, ինչ որ պետք է անես, և թող լինի այն, ինչ պետք է լինի»:

«Ժառանգություն» խմբակցության փոխնախագահ Արմեն Մարտիրոսյանն էլ ընդունելի չի համարում զինյալների գործելաոճը, սակայն կարող է հասկանալ, թե ինչու են նրանք այդ քայլին դիմել: Կարծում է՝ գնացել են այդ քայլին, քանի որ այլ ելք չի մնացել:

Ռուբեն Բաբայանի խոսքով ինքազոհաբերությունը հրաշալի բան է, բայց պետք չէ ուրիշին զոհաբերել: Եվ զինյալները պետք է հասկանան, որ եթե զենք են վերցնում  իրենց ձեռքը, ապա դրանից տուժելու է ամենաանմեղը: «Ես պատրաստ եմ գնալ մնալ պատանդ, կամավոր»,- հայտարարեց Ռուբեն Բաբայանը: