Պապն էլ թուրք է. Յըլդըչըմը խորապես հիասթափված է Լոնդոնի նախկին քաղաքապետից

Թուրքիայի վարչապետ Բինալի Յըլդըրըմը հյուրընկալվել է BBC World-ի «Hardtalk» հաղորդմանը:

Ըստ AA-ի՝ Յըլդըրըմը անդրադարձել է Թուրքիայի՝ ԵՄ անդամակցությանը՝ մի շարք մեղադրանքներ հնչեցնելով Անգլիայի նախկին վարչապետ Դևիդ Քեմերոնի հասցեին:

Նրա խոսքով՝ Անգլիայի՝ ԵՄ-ից դուրս գալու հարցով հանրաքվեի ընթացքում Քեմերոնը Թուրքիայի՝ ԵՄ անդամակցության դեմ մի շարք հայտարարություններ է արել:

«Երանի նա Թուրքիային չօգտագործեր այս արշավի համար: Երանի նա անկողմնակալ լիներ, գուցե այդ ժամանակ արդյունքը տարբեր կլիներ»,-ասել է Թուրքիայի վարչապետը:

Անդրադառնալով նաև Լոնդոնի նախկին քաղաքապետ Բորիս Ջոնսոնին՝ Յըլդըրըմը նրա կողմից արված հայտարարությունները «դժբախտություն» է որակել:

«Պապն էլ թուրք է»,- Յըլդըրըմը հիշեցրել է Ջոնսոնի ծագման մասին, ում պապը՝ Ալի Քեմալը՝ Օսմանյան կայսրության կրթության վերջին նախարարն է:

Թուրքիայի վարչապետը հույս է հայտնել, որ Ջոնսոնը իր պապի հիշատակին «կջանա թուրքերի սիրտը շահել»:

«Իհարկե, նա մեզ հիասթափեցրել է: Ինչ ասեմ նրան, թող Աստված նրան հետ պահի սխալներից: Աստված տա՝ այսուհետ նման սխալներ չանի: Հուսանք՝ նա կջանա թուրքերի սիրտը շահել, բայց արշավն արդեն ավարտվել է: Հանրաքվեն տեղի ունեցավ: Այս պահին կարիք չկա դրան անդրադառնալ: Եղավ-անցավ»,-ասել է Յըլդըրըմը:

Հիշեցնենք, որ Լոնդոնի նախկին քաղաքապետը հաղթել էր Թուրքիայի նախագահ Ռեջեփ Թայիփ Էրդողանի մասին ամենավիրավորական բանաստեղծության մրցույթում՝ գրելով  Էրդողանի և այծի միջև սիրո մասին: