Չի կարելի ակնկալել, որ մեկ հանդիպումը կվերացնի տարակարծությունները. Մերկելը՝ Էրդողանի հետ հանդիպման մասին

Գերմանիայի կանցլեր Անգելա Մերկելը ZDF հեռուստաալիքի եթերում խոսել է Վարշավայում Թուրքիայի նախագահ Ռեջեփ Թայիփ Էրդողանի հետ հանդիպման մասին:

Ըստ Demokrathaber-ի՝ հարցին, թե գերմանացի զինվորները դո՞ւրս են բերվելու Թուրքիայի Ինջիրլիք ռազմաբազայից, Մերկելն ասել է, որ իրենք շարունակելու են հետևել այդ հարցին:

«Չի կարելի ակնկալել, որ մեկ հանդիպումը կվերացնի տարակարծությունները, սակայն մեր հանդիպումը կարևոր էր»,- ասել է նա՝ նշելով, որ հանդիպման ընթացքում ցուցաբերվել են կառուցողական, օբյեկտիվ և վեճերը վերացնելուն ուղղված ջանքեր:

Հիշեցնենք, որ գերմանական Del Spigel թերթն ուշագրավ պնդում է առաջ քաշել Վարշավայում Մերկել-Էրդողան հանդիպման մասին, համաձայն որի` Էրդողանը Մերկելից պահանջել է, որ Գերմանիայի կառավարությունն ու խորհրդարանը Հայոց ցեղասպանության հարցով իրենց որոշումից ետ կանգնեն:

Ավելին՝ Էրդողանը Ինջիրլիք մուտք գործելու թույլտվություն տալու պայման է դրել՝ պահանջելով հրապարակավ հայտարարել, որ խորհրդարանի՝ Հայոց ցեղասպանության հարցով որոշումը կառավարության դիրքորոշումը չէ: «Միայն այն ժամանակ Ինջիրլիք ռազմաբազա մուտքը կթույլատրվի»,- գրել է թերթը: