«Նիսյայով» ծիրան են վերցրել գյուղացիներից ու չեն կարողացել արտահանել

Վերին Լարսի անցակետի փակ լինելու պատճառով վնասներ են կրել դեպի Ռուսաստան, Վրաստան  փոքր ծավալներով ծիրան արտահանողները: Yerkir.am-ի հետ զրույցում Արարատի մարզի մի քանի գյուղերի բնակիչներ բողոքեցին, որ թեև ծիրանի բերքն այս տարի առատ էր, բայց հիմա էլ առաջ է եկել արտահանման խնդիր` Լարսի անցակետի փակ լինելու պատճառով: Վիճակը ծանրանում է նրանով, որ այդ փոքր արտահանողները ծիրանը գյուղացիներից վերցրել են  հիմնականում «նիսյայով»` խոստանալով վճարել ապրանքը Ռուսաստանում, Վրաստանում վաճառելուց հետո:

Արարատի մարզի Նոյակերտ համայնքի ղեկավար Հովհաննես Հարությունյանը մեզ հետ զրույցում ասաց, որ իրենց գյուղից արտահանվել է բավական մեծ քանակի ծիրան: «20 տոննայանոց ֆուռերը Ռուսաստանի ուղղությամբ են շարժվում, իսկ 10 տոննայանոցները`Վրաստանի: Մենք ունենինք վաղահաս ծիրաններ, որոնք մինչև անցակետի փակվելն են տարվել, իսկ հիմիկվա ծիրանի դեպքում էլ ասեմ, որ  մի մասը հաջողությամբ տեղ է հասել, իսկ մի մասը` ոչ, քանի որ Լարսը փակ է եղել, ու մթերքն էլ էդքան որ մնացել է, պարզ է արդեն, թե ինչի վերածված կլինի: Բայց ամբողջ բերքի մասին չէ խոսքը: Հետո ասեմ նաև, որ մեքենաներ էլ կան, որ Լարսի անցակետից շրջվել են դեպի Փոթի՝ այդ ուղղությամբ ծիրանները մի կերպ տեղ հասցնելու համար»,- ասաց գյուղապետը:

Արմաշի գյուղապետ Հակոբ Զեյնալյանն էլ նույն մտահոգությունը հայտնեց,  բայց նաև ընդգծեց, որ, ի տարբերություն մյուս գյուղերի, իրենց մոտ վաղահաս տեսակներն էին ավելի շատ, և արտահանումն էլ ավելի շուտ են կազմակերպել: «Մենք հիմնականում գումարը վերցրել ենք նախապես ու էդ խնդիրը չունենք, բայց դա քիչ քանակի բերքի դեպքում: Ֆուռեր կան, որ շատ են բերք տարել ու գումարը կիսով չափ են տվել, այ դա արդեն խնդիր է առաջացրել»,- ասաց նա: