Ադրբեջանը միշտ էլ ձախողելու է, քանի դեռ մենք հավատում ենք մեր ուժերին. Դավիթ Բաբայան

Տեղեկացրել էինք, որ հուլիսի 7-ի լույս 8-ի գիշերը՝ ժամը 03:20-ի սահմաններում, ղարաբաղա-ադրբեջանական հակամարտ զորքերի շփման գծի արևելյան (Ակնա) ուղղությամբ հակառակորդը ձեռնարկել է դիվերսիոն-հետախուզական ներթափանցման փորձ: ՊԲ առաջապահ զորամասերի կանխարգելիչ գործողությունների արդյունքում հակառակորդի ներթափանցման փորձը ձախողվել է:

Նշենք, որ ապրիլյան դեպքերից հետո սա առաջին դիվերսիոն փորձն է, որ իրականացնում է հակառակորդը:

Yerkir.am-ի հետ զրույցում ԼՂՀ նախագահի մամլո խոսնակ Դավիթ Բաբայանը նշեց, որ նման նենգ քայլերի դիմելն Ադրբեջանի էությունն է: Ըստ նրա` այն, որ հիմա հարաբերական անդորր է` չի նշանակում, որ հակառակորդը փոխվել է կամ վերանայել իր մոտեցումները:

«Որևէ տարօրինակ երևույթ չկա, մանավանդ, որ արդեն 70 տարի ապրել ենք` այդ ահաբեկչական երկրի հետ առնչվելով: Սա նրանց ոճն է և միշտ էլ դիմել են նման սադրանքների:  Մենք ունենք շատ նենգ հակառակորդ, որը կարող է դիմել ցանկացած քայլի: Ի վերջո, չպետք է մոռանալ խոշտանգումները, որոնք նրանք արել էին մեր զոհված զինծառայողների մարմինների հետ»,- ասաց Բաբայանը:

Նա նշեց, որ կարևորն այն է, որ վախի մթնոլորտ չկա, և մենք պատրաստ ենք հակահարված տալ հակառակորդին ցանկացած պահի:

Դիտարկմանը, թե վերջերս շատ է շոշափվում թեման, որ հնարավոր է հակառակորդն ակտիվանա օգոստոս ամսին` նախ ելնելով տարիներ առաջվա դառը փորձից և հաշվի առնելով այն, որ օգոստոսն ավելի պասիվ շրջան է, Բաբայանը պատասխանեց, որ պետք չէ մտածել, որ օգոստոսին մարտական գործողությունների հավանականությունն ավելի մեծ է, քան այլ ամիսների: Հավանականությունը, ըստ նրա,  կախված է մեր ուժից` ինչքան մենք ուժեղ լինենք, ինչքան հակառակորդը իմանա, որ ցանկացած ոտնձգություն պատժվելու է, մարտական գործողություններ սկսելու հավանակությունն ավելի քիչ կլինի:

«Ուստի որևէ ժամկետ չենք կարող նշել: Բացի այդ` ցանկացած պատերազմ սկսելիս, հատկապես` Ադրբեջանի նման ագրեսոր երկիրը միշտ էլ փորձում է քողարկել ժամկետը: Սա էլ է մի ձև, որ մտածում են` կարող են առավելության հասնել: Սակայն մենք տեսանք, որ Ադրբեջանը, մարտական գործողություններ սկսելու ժամանակը քողարկելով հանդերձ, չի կարողանում հասնել հաջողության: Այն, ինչ նա ծրագրել է` ամբողջովին Ղարաբաղը զավթել, զավթել ՀՀ որոշ տարածքներ, ձախողել է, և այդպես լինելու է ընդմիշտ, քանի մենք հավատում ենք մեր ուժերին և պատրաստակամ ենք պաշտպանել մեր հայրենիքը»,- ասաց Բաբայանը: