Անկարան պատրաստ է փոխհատուցում վճարել Մոսկվային. Թուրքիայի վարչապետ

Անկարան պատրաստ է փոխհատուցում վճարել Մոսկվային Սու-24 ռմբակոծիչի խոցման համար։ Այդ մասին հայտնել է Թուրքիայի վարչապետ Բինալի Յըլդըրըմը. հայտնում է РИА Новости-ն:

«Նամակի բովանդակությունը հասկանալի է: Մենք հայտնել ենք մեր ափսոսանքը և անհրաժեշտության դեպքում փոխհատուցում կվճարենք խոցված ինքնաթիռի համար: Երկու երկրներն էլ ցանկանում են հարաբերությունների կարգավորում: Կարծում եմ՝ գործերը կարգավորվում են»,- TRT հեռուստաալիքի եթերում հայտարարել է թուրք վարչապետը:

ՌԴ նախագահի մամուլի քարտուղար Դմիտրի Պեսկովը երեկ հայտնել էր, որ Թուրքիայի նախագահը նամակ է հղել Պուտինին և ներողություն խնդրել խոցված ինքնաթիռի համար, ցավակցության խոսքեր հայտնել օդաչուի մահվան կապակցությամբ և հայտարարել, որ Թուրքիան չէր ցանկանում փչացնել հարաբերությունները Ռուսաստանի հետ` Մոսկվան Անկարայի համար ռազմավարական գործընկեր է:

Ռուսական կողմը, սակայն, ներողությունից բացի, ակնկալում էր նաև հասցված վնասի փոխհատուցում: