Արծվիկ Մինասյանը հարցադրում ուներ` դատավարական նոր օրենսգրքի հետ կապված

Այսօր կառավարության նիստում արդարադատության նախարար Արփինե Հովհաննիսյանը ներկայացրեց ՀՀ քաղաքացիական դատավարության նոր օրենսգրքի նախագիծը և հարակից օրենքների փաթեթը, որի ընդունումը պայմանավորված է մի շարք հանգամանքներով, մասնավորապես` առկա թերություններով, ինչպես նաև ՀՀ նախագահի` իրավական ու դատական բարեփոխումների ռազմավարական ծրագրով, նոր Սահմանադրության ընդունմամբ:

Որոշման վերաբերյալ հարց ուներ էկոնոմիկայի նախարար Արծվիկ Մինասյանը: Նա նշեց, որ նախարարությունն ունի սկզբունքային հարցադրում, որը դեռ չի իրացվել, սակայն կարևոր են համարում մեկ անգամ ևս քննարկման առարկա դարձնել: Ըստ Մինասյանի` խոսքը վերաբերում է 81 հոդվածի 6-րդ մասին` փորձաքննություն  նշանակելու` դատարանի որոշման մասին, որում առաջարկվում է անպայման նշել փորձաքննության անցկացման ժամկետը: Այդ ժամկետի բացակայությունը, ըստ նրա, շատ հաճախ պատճառ է դառնում արհեստական ձգձգումների, առանձին դեպքերում կոռուպցիոն ռիսկեր կարող են ի հայտ գալ:

Վարչապետը Արփինե Հովհաննիսյանից հարցրեց, թե ի՞նչն է պատճառը, որ չեն քննարկել այս հարցը: Արփինե Հովհաննիսյանը պատասխանեց, որ այս նախագծերի փաթեթը երկու անգամ ներկայացվել է շահագրգիռ գերատեսչությունների քննարկմանը, և ինքը ծանոթ է Արծվիկ Մինասյանի դիրքորոշմանը:

«Խնդիր չեմ տեսնում, դատավարական ժամկետների հետ կապված` լրացուցիչ մեկ անգամ ևս կքննարկենք»,- ասաց Արփինե Հովհաննիսյանը: