Փոխնախարարների կրճատման մասով դեռ որոշում չունենք. տրանսպորտի և կապի փոխնախարար

Տրանսպորտի և կապի նախարարությունը նույնպես անցել է օպիմալացման: Լրագրողների հետ զրույցում փոխնախարար Արթուր Առաքելյանը, պատասխանելով հարցին, թե հնարավո՞ր է կրճատվեն փոխնախարարներ` այնպես, ինչպես եղավ գյուղնախարարության պարագայում, նշեց. «Դեռ փոխնախարարների մասով կրճատման որոշում չունենք, մենք նախապատրաստում ենք առաջարկություն ոչ միայն փոխնախարարների, այլև ամբողջ անձնակազմի, նաև մեր ոլորտային ընկերությունների և կազմակերպությունների վերաբերյալ, այնտեղ շատ ու շատ աշխատողներ կան, և այդ օպտիմալացումը չի կարող շատ արագ տեղի ունենալ»:

Նրա խոսքով` նախարարությունը, նախքան վարչապետի կողմից հայտարարված  օպտիմալացման պրոցեսը, արդեն իսկ անցել էր օպտիմլացման, օրինակ` թվայնացման պրոցեսը երբ ավարտվեց, առաջացավ մի իրավիճակ, երբ այլևս անհրաժեշտ չէին այդ թվաքանակով աշխատակիցներ և տեխնիկական միջոցներ, որոնք, փոխնախարարի խոսքով, կրճատվել են:

Արթուր Առաքելյանի խոսքով` փոխնախարարների կրճատման հարցը որոշում են իշխանությունները: «Մենք ունենք երեք փոխնախարար, եթե համեմատեք մյուս նարարությունների հետ, ապա տրանսպորտի նախարարությունում փոխնախարարների թիվը քիչ է»,- ասաց նա: