Նազարբաևը Ղազախստանում «գունավոր հեղափոխությունների» նախանշաններ է տեսնում

Ղազախստանի նախագահ Նուրսուլթան Նազարբաևը երկրում «գունավոր հեղափոխություն» կազմակերպելու փորձերի նախանշաններ է տեսնում: Այդ մասին, ըստ gazeta.ru-ի, հայտնում է նախագահի մամուլի ծառայությունը:

Նազարբաևը հայտարարել է, որ խիստ միջոցառումներ են ձեռնարկելու ծայրահեղականներին ու ահաբեկիչներին ճնշելու համար` ընդգծելով, որ դրա համար պետությունն ունի ուժեր և հնարավորություններ:

«Բոլորս գիտենք, որ, այսպես կոչված, «գունավոր հեղափոխությունները» տարբեր մեթոդներ ունեն և սկսվում են շինծու հանրահավաքներով, սպանություններով, իշխանությունը զավթելու ձգտմամբ: Այդ նախանշանները հայտնվել են նաև մեզ մոտ»,- ասել է նա:

Հիշեցնենք, որ Ղազախստանում` Ակտոբեում, տեղի ունեցած ահաբեկչության կապակցությամբ հունիսի 9-ին երկրում սգո օր է հայտարարվել: