ԱԺ-ն փակ հանդիպման կհրավիրի Նալբանդյանին

Այսօր ԱԺ արտաքին հարաբերությունների մշտական հանձնաժողովի նիստում, նախքան օրակարգին անցնելը, ԱԺ ՀԱԿ խմբակցության պատգամավոր Նիկոլ Փաշինյանն առաջարկեց ԱԺ հրավիրել ՀՀ ԱԳՆ ներկայացուցիչներին, որ ներկայացնեն, թե ինչ քայլեր են ձեռնարկում ԼՂՀ-ն բանակցային կողմ դարձնելու ուղղությամբ:

«Մինչ այս մեզ հավաստիացրել են, որ Հայաստանն անում է ամեն ինչ` Ղարաբաղը բանակցային գործընթացում ներգրավելու համար: Միևնույն ժամանակ, հայտարարություններ են հնչում, որ ՀՀ-ն բանակցային պրոցեսում Ղարաբաղի ներգրավվածության հարց չի բարձրացրել, նաև` Վինենայում: Պետք է հրատապության կարգով ԱԳՆ ներկայացուցչին հրավիրել այստեղ` ոչ թե պարզաբանում տալու,  այլ ապացույցներ ստանալու, որ մինչ այս քայլեր են ձեռնարկվել, որպեսզի ԼՂՀ-ն մասնակցի բանակցային պրոցեսին»,- ասաց պատգամավորը և առաջարկեց հարցն ընդգրկել հրավիրված նիստի օրակարգում:

Արձագանքեց ՀՀԿ-ական Սամվել Ֆարմանյանը` ասելով, թե  Հայաստանի քաղաքականության հիմքում միշտ էլ դրված է եղել Ղարաբաղին բանակցային կողմ դարձնելը: Նրա խոսքով` Հայաստանի իշխանությունների դիրքորոշումը մնում է նույնը` առանց ԼՂՀ-ի լիարժեք մասնակցության, հնարավոր չէ խնդրի կարգավորում, պարզապես այս պահին տեխնիկապես հնարավոր չէ դա կազմակերպել:

Արձագանքեց նաև նախկին ԱԳ նախարար Ալեքսանդր Արզումանյանը: Ըստ նրա` Հայաստանը միշտ էլ շահագրգիռ է եղել բանակցային պրոցեսում, որ Արցախը ներգրավվի, սակայն Ռոբերտ Քոչարյանն ու Վարդան Օսկանյանը Ղարաբաղին դուրս մղեցին բանակցություններից:

Արտաքին հարաբերությունների մշտական հանձնաժողովի նախագահ Արտակ Զաքարյանի կարծիքով էլ` Փաշինյանի առաջարկը տեղին է, և արդեն պայմանավորվածություն են ձեռք բերել ԱԳ նախարարի հետ` կազմակերպել փակ հանդիպում, որի ժամանակ կտրվեն բոլոր հարցերի պատասխանները:  Միաժամանակ, Արտակ Զաքարյանը շեշտեց, որ հանդիպումը պետք է լինի իսկապես փակ, և տեղեկատվություն չպետք է հայտնվի ԶԼՄ-ներում: