«Էլ չկրկնվի». Օբաման Էրդողանի ներկայությամբ զգուշացրել է Թուրքիայի ազգային հետախուզական վարչության պետին

Իրանական ծագումով ադրբեջանցի գործարար Ռեզա Զարրաբի՝ ԱՄՆ-ում ձերբակալության գործով ուշագրավ մանրամասներ են ի հայտ եկել 2013 թվականին Սպիտակ տանը տեղի ունեցած Օբամա-Էրդողան հանդիպման մասին:

Ըստ Siyasihaber3-ի՝ վարչապետության ժամանակ Ռեջեփ Թայիփ Էրդողանը Սպիտակ տանը հանդիպում էր ունեցել ԱՄՆ նախագահ Բարաք Օբամային հետ: Թուրքական կողմից ներկա են եղել նաև Թուրքիայի ազգային հետախուզական վարչության ղեկավար Հաքան Ֆիդանն ու այն ժամանակվա ԱԳ նախարար Ահմեդ Դավութօղլուն:

Հայտնի է դարձել, որ հանդիպման ընթացքում Օբաման բացահայտորեն զգուշացրել է Հաքան Ֆիդանին՝ ասելով. «Մենք լավ գիտենք, թե դուք ինչ եք անում: Էլ չկրկնվի: Այսուհետ հատկապես Ձեզ վրա ենք մեր աչքը պահելու»:

Լուսանկարը՝ Օբամա-Էրդողան հանդպումից: Հաքան Ֆիդանը՝ Էրդողանի ձախ կողմում: 

Ամերիկյան աղբյուրները հայտնում են, որ հենց այդ հանդիպամն ժամանալ էլ քննարկվել է Թուրքիայում ոչ օրինական գործողությունները, սակայն, զգուշացումներին չհետևելու համար Զարրաբի գործով ֆայլը կրկին բացվել է:

Նույն աղբյուրների փոխանցմամբ՝ Զարրաբի գործով բուն դատավարությունները կսկսվեն սեպտեմբերից:

Նշենք, որ Թուրքիայում դեկտեմբերի 17-ի «Մեծ կաշառք» հակակոռուպցիոն գործողության ժամանակ ձերբակալված, այնուհետև ազատ արձակված ադրբեջանցի գործարար Ռեզա Զարրաբը մարտի 19-ին ձերբակալվել է ԱՄՆ-ում: ԱՄՆ արդարադատության նախարարության պաշտոնական կայքէջի տեղեկացմամբ՝ Զարրաբը մեղադրվում է Իրանի դեմ պատժամիջոցները շրջանցելու փորձի, փողերի լվացման, ինչպես նաև բանկային խարդախության մեջ: Ադրբեջանցի գործարարն ու նրա աջակիցները բազմամիլիոնանոց գործարքներ են իրականացրել, որոնց շահառուն եղել են Իրանի կառավարությունը և իրանական մի քանի ընկերություններ: Նրանցից յուրաքանչյուրին սպառնում է մի քանի տասնյակ տարվա ազատազրկում։

Հիշեցնենք, որ Զարրաբի, Էրդողանի ընտանիքի ու Թուրքիայի մի շարք ղեկավարների անունները հայտնվել էին «Մեծ կաշառք» գործողություն ցուցակում: Զարրաբը և ձերբակալվածները կարճ ժամանակ անց ազատ էին արձակվել: