Կառավարության որոշումները կրճատելու հարցը պետք է լուծվի ութ ամսվա ընթացքում

Այսօր կառավարության նիստում տարածքային կառավարման և զարգացման նախարար Դավիթ Լոքյանը ներկայացրեց Լոռու մարզի Ալավերդի համայնքի վարչական տարածքում գտնվող՝ պետական սեփականություն համարվող անշարժ գույքի մասնավորեցումից ստացված միջոցների տնօրինման ծրագրին համաձայնություն տալու մասին հարցը: Մասնավորապես` Ալավերդի քաղաքի ֆոնդային բյուջեում ձևավորված 144 հազար դրամը թույլատրել օգտագործել մանկապարտեզի համապատասխան ծախսերի վրա: Գումարը գոյացել է Սանահին կայարանում ավտոտնակի օտարման արդյունքում:

Վարչապետ Հովիկ Աբրահամյանը արձագանքեց. «Ուզում եմ ևս մեկ անգամ հնչեցնել` նման որոշումները կառավարությունից ձերբազատել, դրանք նախարարությունները թող իրականացնեն»:

Նա հարցրեց կառավարության աշխատակազմի ղեկավար-նախարար Դավիթ Հարությունյանին, թե ինչպե՞ս են տարվում աշխատանքները` կառավարության որոշումների կրճատման հետ կապված, և ե՞րբ են ավարտելու դրանք: Դավիթ Հարությունյանը պատասխանեց, որ այդ աշխատանքները նախատեսում են ավարտել ութ ամսում, և կառավարության որոշումների թիվը պետք է կրճատել 3-4 անգամ: