Գործի անցնելու ժամանակն է. Բաղդասարյանը`օպտիմալացման ծրագրի մասին

 ՀՀԿ խմբակցությանը տրամադրվում է ընդամենը մեկ ծառայողական մեքենա, որը սպասարկում է  խմբակցության քարտուղարին, աշխատակիցներին. Yerkir.am-ի հետ զրույցում հավաստիացրեց ՀՀԿ խմբակցության ղեկավար Վահրամ Բաղդասարյանը:

«Խմբակցությանը մի մեքենա է ընդամենը տրամադրվում, բայց աշխատակազմի մասով ես ինֆորմացիայի չեմ տիրապետում` ինչ մեքենաներ կան, և ում ինչ հատկացումներ  են արվում: Բնականաբար, բոլոր տեղերում, ԱԺ նախագահի հանձնարարականով,  բոլոր այն մեքենաների քանակը, որ կարելի է կրճատել, կրճատվում է: Հնարավոր է նաև վնասված մեքենաներ լինեն, պետք է անդրադարձ կատարվի դրան»,- ասաց նա:

Պատգամավորի կարծիքով` այլ ոլորտներում էլ պետք է վերանայումներ լինեն: «Խոսքը  նաև գործողումների մասին է: Գործուղումները պետք է լինեն խիստ անհրաժեշտության դեպքում, նաև քանակային տեսնակյունից պետք է այնպես անենք, որ հնարավորության դեպքում քիչ մարդ ուղարկենք»,- ասաց նա:

Բաղդասարյանի խոսքով` գործի անցնելու ժամանակն է: «Այնպես որ` ի գործ, հնարավոր չէ, որ չլինեն ուռճածվածություններ, նման երևույթներ: Բնականաբար, հիմա չէ, որ պետք է այդ վերահսկողությունը սահմանվի, դա անընդհատ  բնույթ է կրել, բայց հիմա հարցն ավելի է կոնկրետացվել. բոլոր կառույցները պետք է դրան անդրադառնան»,- ասաց նա:

Հիշեցնենք, որ այսօր կառավարության նիստի ընթացքում վարչապետ Հովիկ Աբրահամյանը հանձնարարական է տվել կրճատել ծառայողական մեքենաների թիվը: