Թուրքական աշխարհում «Դաշնակցություն» անունը լսելիս անգամ փշաքաղվում են. ԱԺ պատգամավոր

ԱԺ պատգամավոր Արագած Ախոյանը երեկ խորհրդարանում բարձրացրեց  հակահայկական քարոզչությանը վերաբերող հարցեր:

Այսօր Yerkir.am-ի հետ զրույցում նա ներկայացրեց որոշակի մանրամասներ և ասաց` խոսքը կոնկրետ ինչին է վերաբերում: Բանն այն է, որ Ուզբեկստանում արդեն տևական ժամանակ է` տարվում է ընդգծված հակահայկական քարոզչություն. տպագրվում են հոդվածներ, գրքեր: Այս ամենի հետևում, ըստ պատգամավորի, կանգնած է Ադրբեջանը:

«Ադրբեջանական քարոզչամեքենան փորձում է իրագործել  իր վաղեմի` պանթյուրքիզմի գաղափարը»,- ասաց պատգամավորը` հավելելով, որ այդ գաղափարի իրականացմանն ամենաընդգծված ձևով խոչընդոտում է Հայաստանը:- «Ամենախանգարողը հայկական պետականությունն ու Հայաստանի գործոնն են, և եթե չլիներ մեր երկիրը, ավելի հեշտ կլիներ իրականացնել պանթյուրքիզմի գաղափարը:  Հիշենք Ալիևի` օգոստոսի վերջին արած հայտարարությունը, թե Զանգեզուրն իրական թուրքական շրջան է, և եթե չլիներ Զանգեզուրի հարցը, Ադրբեջանը կունենար ընդհանուր սահման Թուրքիայի հետ: Ուզբեկստանում հակահայկական քարոզչությունը պանթյուրքիզմի գաղափարի շարունակությունն է և, առհասարակ, Միջին Ասիայում վերջերս կատարվող իրադարձությունները, ինֆորմացիոն քարոզչությունը ևս»:

Պատգամավորը բացատրեց` ինչո՞ւ հենց Ուզբեկստան:  «2014 թվին  մի հոդված տպագրվեց այնտեղ, որը կոչվեց «Դաշնակները Թուրքեստանում»: Մենք դրա վրա աչք փակեցինք`ասելով, որ հիմարություն է, պետք չէ արձագանքել, բայց դրանից հետո արդեն տպագրվեց երկրորդ գիրքը, որը կոչվում է «Թուրքեստանը և Հարավային Կովկասը 18-19 դարերում»: Նրանք հաշվի չառան,  որ դա բոլշևիզմի համատարած պրոյեկտն էր` աշխարհով մեկ, որտեղ կարող էին լինել նաև հայ զինծառայողներ, որոնք կկատարեին բոլշևիկների հրամանները: Նույն բանը ուզբեկը կարող էր կատարած լինել»,- ասաց նա:

 Ախոյանը շեշտեց, որ այս ամենի հետևում Ադրբեջանն  է, հենց այդ երկիրն է գաղափարներ տալիս, ֆինասավորում, որպեսզի նման հակահայկական նյութեր տարածվեն նաև Ուզբեկստանում: «Ամենավտանգավորն այն է, որ Միջին Ասիայում հայատյաց մարդկանց թիվը գնալով ավելանում է, որը կարող է մեր այնտեղի ազգակիցների համար շատ վտանգավոր լինել: Մեր արձագանքն այս ամենին պետք է լինի ադեկվատ, պետք է համապատասխան միջոցներ ձեռնարկվեն»,- ասաց նա:

Պատգամավորը նշեց նաև, որ ադրբեջանական քարոզչամեքենան շեշտ դրել է դաշնակցականների վրա, քանի որ սա այն կուսակցությունն է, որ մեկ դարից ավելի պայքարել է և կարողացել ամբողջ աշխարհում հայապահպան գործունեություն իրականացնել:

«Թուրքական աշխարհում «Դաշնակցություն» անունը լսելիս անգամ մի տեսակ փշաքաղվում են, նրանց մարմնով սարսուռ է անցնում: Նրանք օգտագործում են Դաշնակցության գործոնը, որպեսզի շեշտված ու էֆեկտիվ լինի իրենց ասածը: Դեռ էն ժամանակներից միակ  կառույցը, որն ասոցացվում է վրիժառուների հետ, հենց Դաշնակցությունն է»,- եզրափակեց Արագած Ախոյան: