«Անունը ասա, անունը». հին բարքերը` նոր ԱԺ-ում. գործընկերները գրանցվել են միմյանց փոխարեն

Այսօր` մայիսի 8-ին, ԱԺ նիստի սկզբում «Իմ քայլը» խմբակցության պատգամավոր Համազասպ Դանիելյանը, հատուկ նպատակով մոտենալով ԱԺ ամբիոնին, հայտարարեց` ինքն այսօր արձանագրել է, որ պատգամավորը ԱԺ դահլիճում ներկա չի եղել, սակայն գրանցվել է, հետևաբար` գործընկերն է նրա փոխարեն գրանցվել։

«Սա առաջին անգամ չէ, որ տեղի է ունենում այս դահլիճում, և ես կոչ եմ անում նման քայլերից զերծ մնալ, որովհետև դա ազնիվ չէ», - ասաց նա։

Ի պատասխան Դանիելյանի հայտարարությանը`պատգամավորները խնդրեցին նշել բացակայող պատգամավորի անունը, սակայն Դանիելյանը հրաժարվեց` ասելով` մեկ ուրիշ անգամ:

ԱԺ նախագահ Արարատ Միրզոյանն արձագանքեց. «Իհարկե, կասկածի տակ չեմ դնում Ձեր հայտարարությունը, պարո’ն Դանիելյան, բայց ուղղակի ուզում եմ հիշեցնել, որ այդ բարքերը, հատկապես` մեկը մյուսի փոխարեն գրանցվելը, քվեարկելը, որոնք եղել են նախկինում, այլևս այս խորհդրարանում չեն կարող գործել։ Ես մեծ հույս ունեմ, որ այն, ինչ Դուք նկատել եք, պարզապես թյուրիմացության արդյունք է»: